Gördi merdümler gam-ı gamzenle giryân olduğum MUHAMMES

MUHAMMES

Gördi merdümler gam-ı gamzenle giryân olduğum

Bildi eller zülfün ucından perîşân olduğum

Anladı dil-hastalar derdünle nâlân olduğum

Ben helâk olsam n’ola gam ile hâk olsam n’ola

Yoluna cân virdüğüm duyıldı kurbân olduğum

Eşk-i âhum dehre ifşâ itmedük gam kalmadı

Râz-ı dil söylenmedük iklîm-i ʿâlem kalmadı

Derdmendün olduğum bilmez bir âdem kalmadı

Ben helâk olsam n’ola gam ile hâk olsam n’ola

Yoluna cân virdüğüm duyıldı kurbân olduğum

Ben ʿUbeydî şöyle sanurdum k’idem ʿaşkun nihân

Olmaya râz-ı nihânı ʿâleme hergiz ʿiyân

Bildiler ölümlük olduğum kamu halkı cihân

Ben helâk olsam n’ola gam ile hâk olsam n’ola

Yoluna cân virdüğüm duyıldı kurbân olduğum

(Ünlü 1991: 29-30; Arslan 2013: 252-253)

Ubeydi Abdurrahman Çelebi Hayatı Edebi Kişiliği