Hüsn ü Aşk tan: Tarz-ı selefe tekaddüm etdim

Tarz-ı selefe tekaddüm etdim
Bir başka lugat tekellüm etdim
 
Ben olmadım ol gürûha peyrev
Oymuş belî Gencevî’ye Hüsrev
 
Billâh bu özge mâcerâdır
Sen bakma ki defter-i belâdır
 
Zannetme ki şöyle böyle bir söz
Gel sen dahı söyle böyle bir söz
 
Erbâb-ı sühan tamâm ma‘lûm
İşte kalem işte kişver-i Rûm
 
Gördün mü bu vâdî-i kemîni
Dîvân yolu sanma bu zemîni
 
Engüşt-i hatâ uzatma öyle
Beş beytine bir nazîre söyle
 
Az vaktda söyledimse anı
Nâpuhteligin degil nişânı
 
Gördük nice şâhlar gedâlar
Bir anda yapar anı babalar
 
Gencînede resm-i nev gözetdim
Ben açdım o genci ben tüketdim
 
Şeyh Gâlib “ Hüsn ü Aşk” tan