Işkın odı ser-be-ser tutdı cihânı yandurur

Münyetü’l-Ebrâr ve Gunyetü’l-Ahyâr’dan

Gazel

Işkın odı ser-be-ser tutdı cihânı yandurur

Mahz-ı nûr eyler vücûdı cism ü cânı yandurur

Âşıkun kalbinde zevkun şemmesin kılsam beyân

Ol hevâ germiyyeti kevn ü mekânı yandurur

Ger cemâlin şu’lesinün zerresin keşf eylesem

Şevkı nûrı mihr ü mâh u âsumânı yandurur

Derd-i ışk âfetlerin şerh idemez Abdürrahîm

Neylesün ol söz dile gelse lisânı yandurur

Işka münkirdür safâsız sûfî bilmez anı kim

Âşıkun cânını aşk odı nihânî yandurur

Nasrettinoğlu, İrfan Ünver (1971). Afyonkarahisarlı Şairler, Yazarlar, Hattatlar. Ankara: Nasrettinoğlu Yay. 12.