Kasîde-i Çâr-Ender-Çâr
16.04.2016Kasîde-i Çâr-Ender-Çâr
Cihân bâgında hadd ü zülf ü çeşm ü kaddüñ ey dilber
Biri güldür biri sünbül biri ‘abher biri ‘ar’er
Hayâl ü hasret ü derd ü firâkuñ ey tabîb-i dil
Karâr u ‘akl u sabr u fikri yagma kıldı ser-tâ-ser
Elümde bâd u gözde âb u dilde nâr u başda hâk
Baña kıydı bu zülf ü ‘ârız u hadd ü hat-ı ‘anber
Bu hüsnüñle bu ruhsâr u bu elfâz u bu güftâruñ
Dîlâra vü safâ-bahş u hayât-efzâ vü cân-perver
Melek-sîmâ perî-rû serv-kâmet gonce-femsin sen
Şeker-güftâr u hoş-reftâr u gül-ruhsâr u şîrîn-ter
Cebînüñle ruhuñla ‘ârızuñla gerdenüñ oldı
Cihân-gîr ü cihân-sûz u şeb-efrûz u ziyâ-güster
Leb-i la’l ü dür-i dendân u bûy-ı zülf ü ruhsâruñ
Olupdur her biri memdûh-ı şark u garb u bahr u ber
Müjeñle gamzeñ ile çeşmüñ ile kaşuña kuldur
Kemân-keşler ‘adû-keşler bahâdurlar dil-âverler
Cemâlüñle dehânuñla zebânuñla kelâmuñla
Beden biryân ciger sûzân u dil nâlân u cân bî-fer
Ne Rûm u Şâm içinde var ne yirde gökde mânendüñ
Güneş yüzlü hilâl-ebrû Mesîhâsın perî-peyker
Belâ vü mihnet ü hışm u cefâ vü hecr-i la‘lüñle
Bu ben mahmûr u mahrûra kadeh çeşm ü mey eşk-i ter
Ne hoş demdür ne kutlu gün ne zîbâ vakt ü sâ‘atdür
Ola meclîsde sâz u söz ü dilber bâde-i âhmer
Safâ-yı hâtırum ârâm-ı cânum devletüm ‘ömrüm
Hayâtum sıhhatum varum nigârumsın sen ey dilber
Miyân u kâmet ü la‘l ü ruhuñda cümle hatm olmış
Öpilmekler emilmekler sarılmaklar kuculmakler
Beni kul itdi bir mahbûb-ı hûb u meh-veş u dil-keş
Sürûr-ı dil huzûr-ı cân u nûr-ı çeşm ü sa‘d-ahter
Lebi Şîrîn saçı Leylâ özi Yûsuf yüzi ‘Azrâ
‘Aceb zîbâ ‘aceb ra‘nâ ‘aceb garrâ ‘aceb hoş-ter
Keser çevgân deler cânı açar şerha döker kanı
Çeker yayın atar tîrin çalar tîgın urur hançer
Halâvetde belâgatde letâfetde nezâketde
Dehen şîrîn suhen rengîn beden sîmîn miyân lâger
Hücûm-ı hayl u rahş u darb-ı tîg u top ile oldı
Kevâkib kör ü gerdûn ker zemîn muztar zamân mugber
Garîb ü bî-kes ü bîmâr ü zârem baña olmışdur
Cefâ mahrem ‘anâ zecr ü belâ hem-dem hatâ hem-ser
Belâ vü gussa vü derd ü belâdan olmadum hâlî
Elem bî-hadd sitem bî-‘add u gam bî-gâye hem bî-fer
Kafada râyet-i devlet nazarda ‘asker-i nusret
Yemînüñde yesâruñda turur şemşîr ile hançer
Kul oldum bir şehe kim hüsn ü hulk u haşmet ü hûbdan
İşidenler görenler dir ana server bana ser ver
Senüñdür saltanat rif‘at senüñdür ma‘delet nusret
Felek sâ‘î melek dâ‘î sa’âdet yâr u Hak yaver
Hükümetle şecâ‘atle vecâhetle ‘adaletle
Enûşirvân u Ferruh-ruh Gazanfer-fer Sikender-der
Keyumers ü Siyâmekle saña Hûşeng ü Tahmûres
Karakuldur karavuldur yasavuldur dahi çâker
Midâd ile devât u hâme vü levh oldı bu nazma
Siperler nîzeler zahm-ı ‘adûda karılan demler
Kafañ ile nazar-gâhuñda kâyim râyet ü ‘asker
Yemînüñde yesâruñda müheyyâ hançer ü şeşper
Selîm Hân kim olupdur hüsn ü hulk u ‘adl ü dâd ile
Esed-heybet ‘Alî-sîret Hasan-sûret melek-manzer
Sadâkatle ‘adâletle fesâhatle şecâ‘atle
Şehâ sensin Ebu Bekr ü ‘Ömer ‘Osmân u hem Hayder
Olupdur derd-mendüñ müstemendüñ bendeñ efkendeñ
Eger Hâkân eger Sâsân eger Sâmân eger Sencer
Zebûn Kasım’la Rüstem Kahramân u Güstehem berhem
Ferîdûn dûn Nerîmân nerm ü Sührâb Erdeşîr ahker
Bu eyvân u bu dîvân u bu ‘ayş u nûşuñı görse
Olur Efrâsiyâb u Kayser ü Cemşîd ü Cem çâker
Seher bezm itseñ olur ‘ayş u nûş u zevk u şevk içün
Felek süfre melek sâkî şafak bâde güneş sâger
Simât u mutrib u sâkî vü şem‘ olmaga bezmünde
Gelür her şeb sehâb u keh-keşân zühre meh-i enver
Olur rezm eyledükde hükm ü hıfz u ‘avn u nasr içün
Felek cevşen zırıh encüm siper şems ü kamer migfer
Şehâ vasf-ı had ü hâl ü leb-i hüsnüñle olmışdur
Sözüm rengîn gözüm rûşen dilüm gûyâ zamîr enver
Süvâr-ı esb-i kahr u heybet ü hışm u gazab olsañ
Dil ü cân hayrete varur zemîn ü âsumân ditrer
Enîsüñ şevket ü savlet celîsüñ devlet ü ‘izzet
Zihî nusret zihî fursat zihî kudret zihî leşker
Saña halk-ı nevâ kavm-i ‘Arab hayl-i ‘Acem hem Rum
Kimi hândur kimi sultân kimi şâh u kimi kayser
Şehâ kılsañ sefer şark ile garba zabt u feth içün
Dil ü cândan olur kâfir müselmân bende-i kemter
Karînüñdür rehînüñdür zahîrüñdür esîrüñdür
Kamu feth ü zafer birle kamu begler kamu ‘asker
Ziyâd itsün bu ‘izz ü câh u kadr ü şevketüñ Mevlâ
Bahâr u deyde rûz u şebde olsun Hak sana yâver
N’ola lutf u sehâ vü cûd u ihsânuñ recâ kılsam
Gönül zilletde cân haste beden ‘uryân u ben efker
Garîb ü bî-kes ü bî-çâre vü aşüfte-hâlüm ben
Yolum râh-ı ‘adem gam zâd u hem hem-reh elem rehber
Ciger biryân u göz giryân u dil nâlân u ser galtân
Beden bî-fer ecel ber-ser kefen der-ber-zemîn bister
Şehâ ‘adl ile dâduñ medh ü vasf itmekde ‘Ulvîdür
Kemâl ehli vü kân-ı fazl u hoş-tab‘ u suhen-perver
Bu deñlü kudret ü nazm u bu deñlü lutf u ihsânuñ
Ya Hâfızdur ya Câhızdur Zahîr ü Enverî beñzer
Du’â ile senâ ile fesâhatle belâgatle
Kasîdem bî-nazîr ü bî-şebîh ü bî-misâl ü ter
Nitekim devr-i mihr ü meh şeb ü rûz ola ‘âlemde
Nitekim bunca zîb ü ziynet ü ârâyiş ü zîver
Hudâ-yı Zü’l-celâl ü Zü’l-cemâl ü Hayy u Kâdirden
Müyesser ola saña taht u baht u efser ü kişver
Ulvî. Dîvân-ı Ulvî. Halet Efendi Ek 150 vr.31b-33b; Ali Emiri Mnz 304 vr.32b-34a; Esad Efendi 3409 vr.1b-2b.
0
0
Yorum Yapmak için Kayıt Olun veya Giriş Yapın