Ķaśįde-yi Źātį DernaǾt-ı ŞefįǾü’l-Müźnibįn ve İmāmü’l-Enbiyā

Ķaśįde-yi Źātį DernaǾt-ı ŞefįǾü’l-Müźnibįn ve İmāmü’l-Enbiyā ve’l-Mürselįn

Śallallāhu ǾAleyhi ve Sellem56

FāǾilātün / FāǾilātün / FāǾilātün / FāǾilün

1. Cūş idüp deryā-yı Ǿışķ Allāhu Rabbü’l-Ǿālemįn

Bir güher ħalķ eyledi kim śad hezārān āferįn

2. Ol güher Ǿışķına ħalķ itdi bu dürc-i Ǿālemi

Eyledi aña maķarr üstād-ı Ǿālem-āferįn

3. Bir dür-i yekdānedür deryā-yı śunǾ-ı Ĥaķda ol

Çarħ-ı şāh-ı ķadri parmāġında bir engüşterįn

4. Ĥalķa olup cemǾ ola bir yire cünd-i enbiyā

Cümlesi bir ħātem ü ol ħāteme oldur nigįn

5. Anuñiçün ŧaş baśardı baġrına Ħātem gibi

Ħātem-i cümle Nebįdür ol dür-i deryā-yı dįn

6. Ey mesįrüñ būstān-ı lāħalā vü lāmelā

Kuĥl-i çeşm-i źāt-ı bįnüñ sürme-yi Ǿayne’l-yaķįn

7. Merkebüñ refref maķāmuñ ķābe ķavseyn

Ħalvetüñdür mehbit-i Cibrįl Ķurǿān-ı mübįn

8. Ķaŧre-yi deryā-yı luŧfuñ baĥr-i pür-dürr-i ŝemįn

Bende-yi nūr-ı ruħuñ sulŧān-ı çarħ-ı çārumįn

9. Meclisüñdür gülsitān-ı bāġ-ı firdevs-i berįn

Ĥażretüñdür bülbül-i gülzār-ı Ķurǿān-ı mübįn

10. Būy-ı ħulķuñdan muǾaŧŧar eylemişdüñ Ǿālemi

Ol zamān miskįn olup dururdı ġāyet müşk-çįn

11. Serverā sen on sekiz biñ Ǿāleme sulŧān iken

Āb u gil içre daħı ādem çekerdi erbaǾįn

12. On sekiz biñ Ǿālemi ol Ħalıķ-ı arż u semā

ǾIşķuña ħalķ eyledi ey sāye-yi çarħ-ı berįn

13. Levĥ-i Ĥaķķı levĥine hergiz muśaffā ķalbünüñ

Olmamışdur naķş-ı eşkāl ile Ǿunf-ı kibr ü kįn

14. Parmaġuñdan çeşmeler aķıtduñ anuñ ābına

Sūre-yi Kevŝer Ĥaķı dil-teşnedür mā-yı muǾįn

 [22a] 15. Māh-ı Bedre parmaġuñla bir işāret eyledüñ

Dest-i şevķile yaķasın çekdi çāk itdi hemįn

16. Ey şeh-i Mıśr-ı nübüvvet ķaśr-ı ķadrüñde senüñ

Ĥażret-i Yūsuf güneş yüzlü ġulām-ı meh-cebįn

17. İşiden dir ġoncañ açılsa belāġat baġına

Āferįn ey bülbül-i bāġ-ı belāġat āferįn

18. Ĥaķ budur ey ħˇāce-yi ĥüsn ü bahā olmaz bahā

Ŧurrenüñ bir mūyına yüz bįn ħarāc-ı mülk-i Çįn

19. Meclisüñden çaġruşurlardı melekler Ǿāleme

Hazihi cennāti adnin fe’dħulūhā ħālidin

20. Yücedür eflākden ķadri beĥaķķ-ı ve’đ-đuhā

Ol ki bir yerde senüñle oldı bir dem hem-nişįn

21. Cān u dilden bende-yi fermānuñ olmışdur senüñ

Revnaķ-ı iclās-ı Ǿālį çār aśĥāb-ı güzįn

22. Śubĥ gibi śādıķam ķavlümde ben Śıddįķdur

Āftāb-ı śubĥ-ı śādıķ śādıķ-ı sulŧān-ı dįn

23. Şehsüvār-ı mülk-i heybet ǾÖmer oldı anuñ

Tįġ-i nuśret-bįni įmān ehline ĥıśn-ı ĥaśįn

24. Pādşāh-ı leşker-i ehl-i ĥayā ǾOŝmān k’anuñ

Neşr iderdi levĥ-i sįme ħāmesi dürr-i ŝimįn

25. Ħāzin-i gencįne-yi esrār-ı Ĥaķdur Ĥaķ bilür

Sāķi-yi kevŝer ǾAlį[dür] ĥācib-i ħuld-ı berįn

26. Ālinüñ aśĥābınuñ ezvācınuñ evlādınuñ

Raĥmetin ķılsun mezįd Allāhu Rabbu’l-Ǿālemįn

Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012

 Zati Hayatı

Divanı Mecmuat’ül Letaif

Şem ü Pervane

Zati ile Mesihi atışmas