Mersiye-i Murabba
(Fâ‘ilâtün Fâ‘ilâtün Fâ‘ilün)
 
Cânıma kâr itdi nâr-ı iştiyâk
El-firâk âh el-firâk âh el-firâk  
Olmasun mı tâkatim hasretle tâk  
El-firâk âh el-firâk âh el-firâk (
 
Çarh-ı dûn ‘irfâna olmaz âşinâ
Sundıgı ehl-i dile zehr-i belâ
Gitdi ‘âlemden peder vâ-hasretâ
El-firâk âh el-firâk âh el-firâk
 
Mollacık-zâde idince ‘azm-i râh
İtmedi bir kez peder kevne nigâh  
Dehre olmuşlardı anlar mihr ü mâh  
El-firâk âh el-firâk âh el-firâk
 
İki ‘allâme bulup gamdan necât
Bahş iderlerken dil ü câna hayât
itdi hem Râ’if Efendi gibi zât
El-firâk âh el-firâk âh el-firâk
 
Kalmadı anlar gibi ehl-i hüner
‘İlm ile olmuşlar idi mu‘teber
Açdılar firdevse togrı bâl ü per
El-firâk âh el-firâk âh el-firâk
 
Birbiriyle hayli ülfet itdiler
Sanmañız kim ‘ayş u ‘işret itdiler
Bâb-ı kısmetde hükûmet itdiler  
El-firâk âh el-firâk âh el-firâk
 
Anlara yok kalmadı hayr-ı halef
İtmediler mâl-ı eytâmı telef
Âhımız nây olmasun mı sîne def 
El-firâk âh el-firâk âh el-firâk
 
Mevti hâlinde baña bakdı peder  
Bu dil-i vîrânemi yakdı peder
Zîr-i hâke su gibi akdı peder  
El-firâk âh el-firâk âh el-firâk
 
Çeng-veş kaddin büküp Leylâ fakîr  
Derd ü gam itdi anı gençlikde pîr  
Bu dil-i mecrûha Hak'dır dest-gîr
El-firâk âh el-firâk âh el-firâk

Mehmet Arslan , Leylâ Hanım Dîvânı , 2018
ISBN: 978-975-17-4079-3