Ne ẖoş yaylaḳ imiş bu şehr·i Lādiḳ -Mütekerrir Murabba
Mefāʿīlün mefāʿīlün faʿūlün
Ḳulaḳdan olmış idüḳ gerçi ʿāşıḳ
Bi-ḥamdillāh ki ẖoş gösterdi ẖālıḳ
Ne söz söylendise ḥaḳḳında ṣādıḳ
Ne ẖoş yaylaḳ imiş bu şehr·i Lādiḳ
Yeşil dibāyı giymişler çemenler
Yaḳarlar sīm ḳandīl yāsemenler
Her eṭrāfı gül ü serv ü semenler
Ne ẖoş yaylaḳ imiş bu şehr·i Lādiḳ
Kenārı ṣāfi cūy·ı erġuvānlar
Aḳar her yaña da āb·ı revānlar
Dimāġa bū baġışlar cāna cānlar
Ne ẖoş yaylaḳ imiş bu şehr·i Lādiḳ
Hevāsı muʿtedildür ṣuyı kevs̲er
Dıraẖtı nārvenle serv ü ʿarʿar
Otı reyhān ü sünbül ẖāki ʿanber
Ne ẖoş yaylaḳ imiş bu şehr·i Lādiḳ
Biter deryāsı içre nīlūferler
Ruẖ·ı zerdi virür ʿışḳdan ẖaberler
Gülistānlar teferrüc-gāh yerler
Ne ẖoş yaylaḳ imiş bu şehr·i Lādiḳ
Yapılmış bir serīr·i ʿālī eyvān
Yeşil yapraḳlar olmış aña seyvān
İçindedür anuñ ol şāh·ı devrān
Ne ẖoş yaylaḳ imiş bu şehr·i Lādiḳ
Çü şāhuñ beytini maʿmūr gördüm
İçinde berḳ urur ol nūrı gördüm
Aña ṣaf baġlamışlar ḥūri gördüm
Ne ẖoş yaylaḳ imiş bu şehr·i Lādiḳ
Ki bir ẖurşīd meh-ṭalʿat cebīndür
Ḫadin kim görse der kim yāsemīndür
Ṭarāf·ı kūyı ṣan ẖuld·ı berīndür
Ne ẖoş yaylaḳ imiş bu şehr·i Lādiḳ
Leb·i yādına olmış germ lāle
Ṭurur yek-pā ṭutar elde piyāle
Ḳurardı üstine ẖayme·i vāle
Ne ẖoş yaylaḳ imiş bu şehr·i Lādiḳ
Pür olmışdı gülile ṣaḥn·ı gülşen
Ḳabaġı ṭoldurup dutmışdı sūsen
Çemen sultānı güldür vech·i aḥsen
Ne ẖoş yaylaḳ imiş bu şehr·i Lādiḳ
Düzetmiş ṭūti ḳumrī çengine çeng
Nevāda sāza ṭutmış ḳuşlar āheng
Eline bāde almış lāle gül-reng
Ne ẖoş yaylaḳ imiş bu şehr·i Lādiḳ
Terennümler ḳılurdı anda bülbül
Ṣafāsından didi ẖandān olup gül
Ṣurāhī mül demidür ne taḥammül
Ne ẖoş yaylaḳ imiş bu şehr·i Lādiḳ
Ḳamu eşcār cemʿ olmış bu cāya
Ferḥādan her biri ḳarṣardı aya
Melek ṣalmış meger üstine sāye
Ne ẖoş yaylaḳ imiş bu şehr·i Lādiḳ
Güle nergis ṭurup süzmiş gözini
Açılmış goncalar düzmiş yüzini
Budur firdevs bāġınuñ güzīni
Ne ẖoş yaylaḳ imiş bu şehr·i Lādiḳ
Çiçekler vecde gelmiş eylemiş cūş
Kimi ser-ẖōş olmış kimi ẖāmuş
Bular ẖoş ʿışḳ ayaġın eylemiş nūş
Ne ẖoş yaylaḳ imiş bu şehr·i Lādiḳ
Emīr·i ʿāşıḳān gül bu karanfil
Biter anda benefşe nergis ü gül
Güle ḳarşu ider efġān bülbül
Ne ẖoş yaylaḳ imiş bu şehr·i Lādiḳ
Eger ʿaḳluñ varise ṭoġru dut rāh
Varıdur elmalu baġçeye hergāh
Aġaçlar sāye ṣalmış ṣanki her gāh
Ne ẖoş yaylaḳ imiş bu şehr·i Lādiḳ
Ne dil ile kılayum taḳrīr anı
Dinilmez ḥaşre dek anuñ beyānı
Bulunmaz ser-te-ser gezseñ cihānı
Ne ẖoş yaylaḳ imiş bu şehr·i Lādiḳ
Yapılmış anda bir şāhāne ḥammām
Yeni ḥammām dirlermiş aña nām
Hem olmış ay ü güneş saḳfına cām
Ne ẖoş yaylaḳ imiş bu şehr·i Lādiḳ
Ṣuyı cüllāba beñzer ḥavżı vardur
Māl-ā-māl olmış içi āb·ı güldür
Diyār·ı Rūm içinde şimdi birdür
Ne ẖoş yaylaḳ imiş bu şehr·i Lādiḳ
Eyü çekdük bu devrānuñ cefāsın
Görelüm bārī bir kere vefāsın
Sürelim imdi zevḳile sefāsın
Ne ẖoş yaylaḳ imiş bu şehr·i Lādiḳ
Zehī vaḳṭ ü zehī zevḳ ü zehī dem
Ferāḥlar geldi gitdi ġuṣṣa vü gam
Diyeyin cān ile ben daẖi her dem
Ne ẖoş yaylaḳ imiş bu şehr·i Lādiḳ
Zehī ferḥunde ṭāliʿ bunda her gāh
Muḳīm olur bu cāya sāl ü bā-māh
Ki geçmiş ʿömrümüz ḥayfā hezār āh
Ne ẖoş yaylaḳ imiş bu şehr·i Lādiḳ
Duʿālar eyle Mihrī şehr·i yāre
Ki anuñ luṭfından irdüñ bu diyāre
Ki gördüñ gizlü genci āşikāre
Ne ẖoş yaylaḳ imiş bu şehr·i Lādiḳ
Kerem kānıdur ol şehler emīri
Ki ṭopraḳdan götürdi her faḳīrī
Ḫudā olsun ilāhī dest-gīri
Ne ẖoş yaylaḳ imiş bu şehr·i Lādiḳ
Prof. Dr. Mehmet Arslan, Mihrî Hâtun Dîvânı, T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2018 ISBN: 978-975-17-4027-4
