KASİDE

Ol şâh-ı dehr idüp yine ihyâ-yı saltanat
Gösterdi kâyinâta temâşâ-yı saltanat

Envâr-ı zât-ı pâki ile toldı cümleten
Âfâk-ı ʿizz ü şevket ü dünyâ-yı saltanat

Âsûde kıldı sâye-i lutfıyla ʿâlemi
Ol serv-i sebze-zâr-ı mutarrâ-yı saltanat

Hiç şecʿ degül yanında selâtîn-i sâlife
Ana müfevvez olalı eşyâ-yı saltanat

Bir pâdişâh-ı leşker-i encüm-şümârdur
Mülk-i refîʿi ʿâlem-i bâlâ-yı saltanat

Âyâ güneş midür görinen tâk-ı çarhda
Yâ şemme-i sarây-ı mücellâ-yı saltanat

Hakkun nesîm-i lutfı ile açılup-durur
Yâ verd-i zerd-i ravza-i raʿnâ-yı saltanat

Yâhûd şarâb-ı şevk-i safâ-bahşile tolu
Bir câm-ı dil-küşâ-yı musaffâ-yı saltanat

Gerdûn idüp-durur yâhûd ihzâr-ı kurs-ı zer
Nakş ide diyü sikke-i dârâ-yı saltanat

Sultân-ı kâm-kâr u şeh-i maʿdelet-penâh
Hâkân-ı tâc-dar-ı dil-ârâ-yı saltanat

Keyvân-serîr hazret-i Sultân Selîm kim
Oldı mekânı taht-ı muʿallâ-yı saltanat

Mirʿât-ı pâk-tabʿ-ı selîmün-durur senün
Meclâ-yı ʿaks-i sûret-i zibâ-yı saltanat

Bir mâlik-i serîr-i Süleymân-ı dehrsin
Toldı sana rüʾyet-i bâlâ-yı saltanat

Ş’ol ism-i bi-misâlün ile nâm-dâr olup
İrdi kemâl-i rifʿate tuğrâ-yı saltanat

Tekmîl-i ʿadl ü dâd ile tahsîl-i nâm idüp
Feth oldı sana şimdi muʿammâ-yı saltanat

Başına geldi niçe belâ-yı siyâhlar
Devründe ş’ol ki eyledi sevdâ-yı saltanat

Şemşîrünün kazâsı nizâʿını katʿ ider
Her kim senünle eylese daʿvâ-yı saltanat

Meydân-ı maʿrekende giyüp leşkerün zirih
Mevc urdı anda lücce-i deryâ-yı saltanat

Şâhâ nişân-ı mîh-i semendün ne yirde kim
İtdi zuhûr toğdı süreyyâ-yı saltanat

Virdi Hüdâ murâdını hayli zamândur
Zât-ı şerîfün itdi temennâ-yı saltanat

Dâyim düşerse üstüne iy şâh yiridür
Yakışdı sana hilʿat-ı zîbâ-yı saltanat

Kasdı budur ki bekleye yanunı tâ ebed
Şemşîr-i tâb-dâr-ı mücellâ-yı saltanat

Ben ol ʿUbeydî’yem ki sunup hâk-i pâyüne
Sâbıkda bir kaside-i garrâ-yı saltanat

ʿAvn-i İlâh ile dimiş idüm ben anda kim
Sana ʿinayet oldı ʿatâyâ-yı saltanat

Kavlümde sâdık olduğum içün beni bugün
İrgür murâda iy şeh-i aʿlâ-yı saltanat

Evlâdum ile dâʿî-yi iclâlünüm senün
İy meh rikâb u şems-i hüveydâ-yı saltanat

Devrân sahîfesinde sana kim ki harf atar
İdüp tırâş tîğı ile tâk-ı saltanat

Her gevheri ki kıymeti dünyâ degül müdâm
Karşunda duta sini ile tâ-yı saltanat

 (Ünlü 1991: 4-6; Arslan 2013: 213-216)

....Ubeydi Abdurrahman Çelebi ( 16. yy) Hayatı ve Edebi Kişiliği