Olmasun aġyar ile yāri İlāhi kimsenüñ
21.10.2020
Fāʿilātün fāʿilātün fāʿilātün fāʿilün
Olmasun aġyar ile yāri İlāhi kimsenüñ
Arṭmasun günden güne derd ile āhı kimsenüñ
Geceler ney gibi nālān eylerem gündüz fiġān
Olmasun bencileyin ḥāli İlāhi kimsenüñ
Āsitānuñdan beni menʿ itme nāṣıḥ dil-berüñ
Kāʿbeye yüz süricek ḳalmaz günāhı kimsenüñ
Zāhidā ʿayb eyleme dil virdigüm dilberlere
Olmamaḳ bunlara olur mı nigāhı kimsenüñ
Ḥüsn iline şāh olalıdan yıḳar dil şehrini
Böyle zālim olmasun hiç pādişāhı kimsenüñ
Gāh zülfi ḥāˀil olur ruẖlarına geh ẖaṭı
Ḳalmasun Mihrī seḥāb içinde māhı kimsenüñ
Prof. Dr. Mehmet Arslan, Mihrî Hâtun Dîvânı, T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2018 ISBN: 978-975-17-4027-4
