Râz-nâme’den

Hamd-i pâk ol pâke cân-ı pâkden

K’âdem eyler kudretiyle hâkden

Âfitâb-ı rûha andandur ziyâ

Şem‘-i akl andan bulur nûr-ı safâ

Hikmetiyle nutfede ol cân ider

Âfitâbı zerrede pinhân ider

Bahr-i feyzinden dü âlem kasredür

Mihr-i cûdından dil ü cân zerredür

Bânî’-i bünyâd-ı sakf-ı bî-sütûn

Nakş-bend-i tâk-ı çarh-ı nîl-gûn

 Çarha seyr ü kutba andandur sebât

Akl u nefs ü rûha ol virür hayât

Aklun ol aklı vü cânun cânıdur

Cüz’ ü küllî zâtınun bürhânıdur

Hikmeti mecmû‘-ı fi‘lün fâ‘ili

Kudreti mecmû‘-ı şey’ün şâmili

Hîç akl-ı hurde-bîn ü nüktedân

Kendü zâtından anun virmez nişân

Âfitâb-ı zât-ı pâkinden yakîn

Dîde-i akl olmamışdur zerre-bîn

Dâl durur hikmetine kâf u nûn

K’andan oldı nakş-ı bîrûn u derûn

İrdi her mevcûda cûdından vücûd

Zü’l-minen bî-minnet eyler feyz-i cûd

Evveli her evvelün bî-ibtidâ

Âhiri her âhirün bî-intihâ

 Pâdişâh oldur ki bâkî izzeti

Hem mucizz ü hem müzil yoh zilleti

Hâk-i dergâhı selâsîn-i cihân

Halkasıdur bâbınun heft âsumân

Gâh virür tâc u taht u mâl ü c

Gâh eyler mâlı mâr u câhı çâh

Hâkim ol durur ki hükmidür revân

Mâni‘ olmaz emrine kevn ü mekân

Oldı vasfında zebân-ı akl lâl

Kimsene andan nişân virmek muhâl

Yıldırımer, Mestan (2004). 15. Yüzyıl Şairlerinden Gülşenî-i Sarûhânî'nin Râz-nâme (Makâlât-ı Gülşenî) Adlı Eserinin Tenkitli Metni. Yüksek Lisans Tezi. İstanbul: Marmara Üniversitesi. 42.

Şeyh İbrahim Gülşeni Hayatı ve Şeyhliği