Gazel
Sâkiyâ ko zâhidün peymânın al peymâneyi
Meclisi germ it ki mihmân etmişüz cânâneyi
Işkı bahrında zamânlardur ki gavvâsam bana
Şimdi verdi küntü kenzün hâzini dür-dâneyi
Gönlümi cânâ hayâlün lutf edüp kıldı makâm
Müstedâm olsun ki ma’mûr etdi bu vîrâneyi
Defter etmek dilesen dîvânesini zülfünün
Dilberâ yaz evvel ol dîvâna ben dîvâneyi
Nitekim sen şem’e yakmak ögredüp üstâdsın
Ben dahı yanmakda şâgird etmişem pervâneyi
Mutribün kavlin işit ko zâhidün akvâlini
Dinleme zâhid sözin işitmegil efsâneyi
Key perîşândur Atâyî zülfüne tolaşalı
Mest ü hayrândur görelden sen gözi mestâneyi
Canpolat, Mustafa (hzl.) (1982). Ömer bin Mezîd, Mecmû’atü’n-Nezâ’ir. Ankara: TDK Yay. 208.