ŞARKI Çözülme zülfüne ey dil-rübâ dil bağlayanlardan

Çözülme zülfüne ey dil-rübâ dil bağlayanlardan

Kaçınma âteş-i aşkınla bağrın dağlayanlardan

Düşer mi ictinâb etmek seninçün ağlayanlardan

Sirişk-i çeşmimin bak farkı var mı çağlayanlardan

Gelüb vakt-i bahâr âlem safâ-yı gül-şen etdikde

Nevâ-yı bülbülü gûş-i gül-i ra'nâ işitdikde

Uyub ahbâba sen de seyr-i Sa'd-âbâd'a gitdikde

Sirişk-i çeşmimin bak farkı var mı çağlayanlardan

Senin bir reng-i zîbân var ki gül-berg-i izârında

Bulunmaz gül-sitân-ı âlemin bâğ-ı bahârında

Otur ihrâma ârâm et bir az havzın kenârında

Sirişk-i çeşmimin bak farkı var mı çağlayanlardan

Hevâ-yı perçeminle başka bir hâlet olur serde

Yeni başdan misâl-i Vâsıf uğratdın beni derde

Gamınla gerçi çokdan ağlarım ammâ bugünlerde

Sirişk-i çeşmimin bak farkı var mı çağlayanlardan

Enderunlu Vasıf