Fāʿilātün fāʿilātün fāʿilātün fāʿilün
Şöyle kim dil ẖānesinde mihr·i cānān gizlüdür
Nitekim cānda elif ten içre hem cān gizlüdür
Dāmenin öp devlet isterseñ yüziñ sür pāyine
Derdine vir cānuñ ey dil anda dermān gizlüdür
Ḳaşı bismillāh ile oḳı cemāl·i muṣḥafın
Küfr·i zülfinde gör anuñ nice īmān gizlüdür
Leblerinde dişleri naẓmın gören dir gūyiyā
Ḥoḳḳa·i yāḳūt içinde dürr ü mercan gizlüdür
Müddeʿīyi güldürüp aġlatmasun diñ beni yār
Ġarka virür ʿālemi yaşumda ṭūfān gizlüdür
Ġam degül ṭutsa ẖaṭı yārüñ ˀiẕārı çevresin
Ẓulmetüñ içinde lā-büd āb·ı ḥayvān gizlüdür
Ġamzesi oḳlarına sīnem nişān olalı āh
Yār bilür yüregümde niçe peykān gizlüdür
Ġuṣṣasın dilde görüp ṣordı ẖayāli ben didüm
Ḫayli müddetdür derūnumda bu mihmān gizlüdür
Āşikāre būse cer itdüm lebinden didi yār
ʿĀrif ol ʿārif ḳatında luṭf ü iḥsān gizlüdür
ʿIşḳ bir sırr·ı ilāhīdür ne bilsün mübtedī
Ḥamdülillāh Mihrī cāhilden bu ʿirfān gizlüdür
Prof. Dr. Mehmet Arslan, Mihrî Hâtun Dîvânı, T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2018 ISBN: 978-975-17-4027-4
0
0
Yorum Yapmak için Kayıt Olun veya Giriş Yapın