Zülfüñe kimdür diyen kim ẓulme şimdi başlar

123
fāʿilātün fāʿilātün fāʿilātün fāʿilün
 
Zülfüñe kimdür diyen kim ẓulme şimdi başlar
Zülfüñ ucından degül mi bu kesilen başlar

Çīn·i zülfini görelden sen Ḫıṭāyī-beççenüñ
Ḳıl ḳalemlerin el ucı ̮ile ṭutar naḳḳāşlar

Ḳara Kaʿbe örtüsi ̮ile örtesüz tābūtumı
Ölicek zülfi ġamından dōstlar ḳardaşlar

Ḳatı göñlinden şikāyet itdügümçün dōstuñ
Üşe gelür ẖalḳ·ı ʿālem ben delüyi daşlar

Baḳmaz oldı ben gedāya işigüñde itlerüñ
Gerçi yıllardur ki bir yaṣduġa ḳoruz başlar

İdemezdüm ḥabs·i tenden ben kekez cānı ẖalāṣ
Derd ü ġam itdi baña yoldaşlıḳ şāpāşlar

Ġuṣṣa vü ġamdan Necātī iḥtiyāṭ it key ṣaḳın
Çoġ olur kim öldürür yoldaşını yoldaşlar
 
Ali Nihad Tarlan, Necāti Divanı -

 Necati Bey Hayatı

Necati Bey Şiirleri