ʿIşḳ āteşine yanıcı pervānelerüz biz
Mefʿūlü mefāʿīlü mefāʿīlü feʿūlün
ʿIşḳ āteşine yanıcı pervānelerüz biz
Bu āteşe per yaḳmıyacaḳ ya nelerüz biz
Nūş eylemişüz rūz·ı ezel cāmını ʿışḳuñ
Tā ḥaşre dek ol şevḳ(i)le mestānelerüz biz
Var ẖān-ḳaḥı bekle riyāy ile sen ey şeyẖ
S̲ābit ḳademüz sākin·i meyẖānelerüz biz
Ġāfil ḳomazuz ẖublaruñ elden ölince
Zencīr·i ser·i zülfiñi divānelerüz biz
Rüsvālıġumuz ẖalḳ·ı cihān bildi ne ġam çün
Gūş eylemezüz nāṣıḥı rindānelerüz biz
Meydānına ʿışḳuñ bugün iẖlāṣla girdük
Baş oynayıcı bir niçe merdānelerüz biz
Ey dōst raḳībile ṭurup ṣoḥbet idersin
ʿUşşāḳlaruz çün yine bī-gānelerüz biz
Ḳılmaḳ dileriseñ dil·i vīrāneyi maʿmūr
Gel göñlümüzi yap ḳatı virānelerüz biz
Terk·i dil ü cān itmeyecek dōst yolında
Ey Mihrī nice ṭālib·i cānānelerüz biz
Prof. Dr. Mehmet Arslan, Mihrî Hâtun Dîvânı, T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2018 ISBN: 978-975-17-4027-4
