Dâstân-ı Dil-sitânuñ Mebde’ vü Matla
08.04.2016Bu Dâstân-ı Dil-sitânuñ Mebde’ vü Matla‘ı ve Bu Efsâne-i
Pür-füsûn u Sa‘âdet-nümûnuñ Menşe’ vü Menba‘ıdur
Söyle ey bülbül-i sühan-perdâz
K’açılur sözüñ ile perde-i râz
‘Âlemüñ sen de nükte-dânisen
Bülbül-i gül-şen-i ma‘ânîsen
Yeter ol ġonce gibi beste-dehen
Yine dem ur gül-i ma‘ânîden
Eyle ‘uşşâka nâleñi dem-sâz
Perde-i ‘aşkdan düzet bir sâz
İşidüp Zühre sâzuñ âhengin
Yerlere çala reşkile çengin
Eyle gülden hikâyet-i rengîn
Şâd-mân olsun işiden ġam-gîn
Bülbül-i gül-sitân-ı efsâne
Böyle kılmış beyân-ı efsâne
Ki meger rûzgâr-ı mâzîde
Eltef ü eşref-i arâzîde
Ya‘nî Rûm içre var idi bir şâh
Lutf-ı tab‘ ile hurrem ü dil-hâh
Şâh-ı ferhunde-câh u ferruh-fâl
Nîk-rû nîk-hû vü nîk-hısâl
Cümle ef‘âli i‘tidâl üzre
Hüsn ü hulkı kamu kemâl üzre
Saf-tab‘ u latîf ü rûşen-rây
Dil-güşâ vü zarîf ü rûh-efzây
Bir şehen-şâh idi bülend-vakâr
Adına dirler idi Şâh Bahâr
Âb-ı ‘adliyle tâze rûy-ı cihân
Bâd-ı lutfıyla dehr misl-i cinân
Lutf u ihsân ü cûdile ma‘rûf
‘Adl ü insâf ü dâdile mevsûf
Hükmi âfâka yil gibi sârî
Emri her yirde su gibi cârî
‘Adl ü dâdı misâl-i bâd-ı seher
Eylemiş rûy-ı dehri tâze vü ter
Kimse devrinde eylemez zâr
Meger ancak hezâr-i gül-zârî
Kimse çekmez kimesneye hancer
Gül-şen içre meger ki Sûsen-i ter
Kimse urmaz kimesneye sûzen
Sîne-i Bülbül’e meger ki diken
Kapamaz kimse kimseden efser
Lâle tâcın meger ki bâd-ı seher
Sebzeden yir yüzinde ceyşi füzûn
Hadd ü ‘add ü şümârdan bîrûn
Berg ü bârına hadd ü ‘add yogıdı
Berg-i eşcârdan dahı çogıdı
Yogıdı ‘ayn-ı Nergis-i gül-zâr
Altun üsküflü kullarına şümâr
Biñ sileh-dârı nâr Sûsen-vâr
Cümle jengâr-pûş u hancer-dâr
Serv-i âzâde gibi bâlâ-ser
Kulı biñ ola sancaġını çeker
Hâr-veş tîz-rûy ü tîr-efgen
Nîze-dârı hezâr şîr-efgen
Nice biñ peyki var nesîm-âsâ
Her biri hem-çü ‘ömr ü tâc-rübâ
Burc-ı rif‘atde ahter-i tâbân
Dürc-i devletde gevher-i rahşân
Bâğ-ı ‘ömrinde bir gül açılmış
Hak’dan üstine feyz saçılmış
Bir oğul virmiş aña Hazret-i Hak
Gül gibi bâğ-ı ‘âleme revnak
Adı gül gerçi dahı ter-gonca
Bâğ-ı hüsn içre başlamış gunca
(Gencay Zavotçu)
0
0
Yorum Yapmak için Kayıt Olun veya Giriş Yapın