Figan ey Mevlevî dilber ki çeşm-i fitne-engîzün

Gazel

Figan ey Mevlevî dilber ki çeşm-i fitne-engîzün

Beni öldürmege cem’ eylemiş müjgân-ı hûn-rîzün

Olurmış Mevlevî zünnâr-bend-i küfr bilmezdüm

Temâşâ itmesem kâfir senün zülf-i dil-âvîzün

Semâ’ itdükçe nûr-ı mihr-i hüsn-i şu’le-sûzundan

Olur hurşîd-i mahşer zerre-i bî-kadr-i nâçîzün

Kıyâmet ferş-i râhun fitne der-zencîr-i zülfündür

Gelince cünbiş-i reftâra bâlâ-yı belâ-hîzün

Hayâdan gerçi sen bakmazsın ammâ çeşm-i ‘uşşâkı

Tecellî-zâr kıldı âteş-i hüsn-i şerer-rîzün

Nigâhun fitne-pâş oldukça dest-efşân semâ’ içre

Derûn-ı câna hançer-rîz olur müjgân-ı ser-tîzün

Şikâyet itmesün lutf it Fehîm ey mâh cevründen

Girerse destine dâmân-ı ferdâ Şems-i Tebrîz’ün 

(Tahir Üzgör (hzl.) (1991). Fehîm-i Kadîm Hayatı, Sanatı, Dîvân’ı ve Metnin Bugünkü Türkçesi. Ankara: AKM Yay. 549-550)

 Fehim-i Kadim Hayatı ve Eserleri

Fehim-i Kadim Divanı

Fehim-i Kadim Şehrengizi Diğer Eserleri