GÜNEŞ KASİDESİ Der-Medh-İ Sultan Mehmed Han

GÜNEŞ KASİDESİ

Der-Medh-İ Sultan Mehmed Han

1- Taht urup tâk-ı felekde husrev-i hâver güneş

    Giydi nârenci kabâ urundu nûr efser güneş

2- Mesned-i sultân-ı subh oldu serîr-i âsumân

    Saçdı pirûze tabaklardan zer ü gevher güneş

3- Kufl açıp dürc-i zebercedden cevâhir döktü kim

     Hâk gencin eyleye gencîne-i cevher güneş

4- Kulzüm-i Hindin batırmaga gümüş zevrakların

     Bâd-bân-ı nûr ile donattı fülk-i zer güneş ­

5- Gûyiyâ Nuşîn-Revân-ı subhdur kim adı için

     Lâciverdî kubbeye zincir-i zer asar güneş

6- Ya felek Mısrında sultân oldu bir Yûsuf-cemâl

    Ya Züleyhâdır tutar nârenc-i zer-peyker güneş

7- Yâ cemâline cihânın nûr u fer vermek için

    Rûz ruhsârından açtı anberin mi'cer güneş

8- Hak budur kim Şâh divânın temâşâ kılmaga

    Düzdü tâk-ı zer-nigâra la'lden manzar güneş

9- Kendinin hüsn ü cemâlin fikr ederken germ olup

    Cân diliyle eyledi bu matla'ı ezber güneş

10- Subh-dem cevlân edip tâvûs-i zerrîn-per güneş

      Bûstânına sipihrin verdi zib ü fer güneş

11- Kûze-i yakut ile pîrûze-gûn dôlâbdan

      Çarh-ı mînâ-rengi sîmâb etti ser-tâ-ser güneş

12- Bezm-i ayşın Zöhrenin germ etmege sâkî sıfat

      Âb-gûn akdâh içinde gezdirir âzer güneş

13- Geh hamâm-i mâh-i tâbâna takar sîmîn cenâh

       Geh düzer Sîmurg-ı çarha âteşîn şeh-per güneş

14- Ayda bir kez kâsesin anberle mâhın doldurur

       Tâ ki Şeh bezminde bir dem gezdire micmer güneş

15-Zıll-ı Hak Sultân Muhammed Hân ki olmuşdur anun

      Eşigi topragının her zerresi enver güneş

16- Nitekim her dânenin zımnında muzmerdir şecer

       Zerre-i hâk-i derinde şöyledir muzmer güneş

17- Pâdişâh-ı heft iklîm-i sa'âdettir k'anun

       Hâk-i pâyi cevherin edindi tâc-ı zer güneş

18- Bir şehenşâh-i kader-kadr ü kaza-râdır k'olur

       Bâmına hindû Zuhal der-gâhına çâker güneş

19- Nûr-ı çeşm-i âlem ü çeşm ü çerâg-ı kâ'inat

      Sensin ey Şeh kim yüzün nûrundan umar fer güneş

20- Sensin ol kim âsumân iklimine sultan iken

      Gerd-i haylinden urunur anberîn efser güneş

21- Sensin ol kim hıl'at-i fermân-ı hükmün giymeden

       Olmadı zer tîg ile sultân-ı bahr ü ber güneş

22- Sensin ol kim şeh-nişîn-i bezm-gâhında müdâm

      Yâ Süleymân tahtıdır yâ câm-ı İskender güneş

23- Sâki-i bezmin ele câm aldıgınca der hıred

       Ya güneş sagardadır yâ gezdirir sagar güneş

24- Ey ki bâb-ı rif'atinde halka-i sîmîn hilâl

       Vey ki devr-i kubbe-i izzinde zer çenber güneş

25- Kadrin ordusunda gök bir sâye-bândır kim ana

      Ser-imâd-ı sîmdir mâh ü tınâb-ı zer güneş

26- Ey ki mihrinden zemın ü âsuman germ olmaga

      Şeb sipend olmuştur encüm fülfül ü âzer güneş

27- Ahd-i adlinde yumarlar cümle ıldızlar gözün

       Girdigince çeşme-i kâfura bî-mizer güneş

28- Vermese Iûtfun eli rahm-i felekde perveriş

       Mâder-i eyyâmdan dogmazdı tâ mahşer güneş

29- Nâ-gehân erse sipihre nâr-ı kahrın zerresi

      Âsumân dûd-ı siyâh olurdu hâkister güneş

30- Şöyle korkutmuş yüregin hançerin tîz-âbı kim

       Kanda bir su görse berg-i bîd-veş titrer güneş

31- Mihrinin bâzârına bir vech ile germ oldu kim

       Kapıdan yüz kez kovarsan bacadan düşer güneş

32- Geh ser-i nîzenle bozulur sevâd-ı rûy-i mâh

       Geh gubâr-ı sümm-i esbinden olur agber güneş

33- Gûyiyâ na'l-i semendindir hilâl-i ıyd-i feth

       Mih-i ahterdir zafer burcunda ne ahter güneş

34- Ömr-i hasmına şebîhin etmek için her gece

       Gök' giyer Şâmî zırıh mehden düzer migfer güneş

35- Düşmanın kanın döküp tig-i zer-endûdun siler

       K'atlas-ı gerdûnun eyler dâmenin ahmer güneş

36- İsmetin devrânıdır isminde te'nîs olmagın

      Seyre çıkdıkca bürünür nûrdan çâder güneş

37- Kangı iklîme ki pertev salsa adlin sâyesi

        Ol diyar içre görünür zerreden kem-ter güneş

 38- Cevher eyler çün kara topragı lûtfun tâbişi

      Gam degil etmezse ayruk sengden gevher güneş

39- Mâh-ı râyât-ı celâlinden hacildir âsumân

      Sâye-i şebde hayâdan gizlenir ekser güneş

40- Husrev-i rûy-i zemîn dersem ne fahr olsun sana

       K'âsumân-ı kasr-ı kadrinde oldu hâk-i der güneş

41- Kanda benzer kasrına bir âfitâbıyla felek

       K'anda her bir cam oluptur bir ziyâ-güster güneş

42- Hergîz olmayaydı jenginden küsûfun rû-siyâh

       Ger sıgınsa sâyene âyine-i hâver güneş

43- Âfitâb-ı râyına olmaz mukâbil nice kim

      Arz ede tabı u alemle nûrdan leşker güneş

44- Tîg-i âteş- bâr-ı rûşen-rûy-i dîn-ârâyınım

       Kabzasına mâh ahter yüzüne zîver güneş

45- Ger Skender istese envâr-ı râyından meded

       Râh-ı zulmette olurdu haylına reh-ber güneş

46- Şehriyârâ adını minberde yâd etse hatib

       Nûr ile mescid dolar filhal olur minber güneş

47- Bahr-ı cûdundan felek fülkün cevâhir doldurup

       Düzedir şekl-i hilâlîden gümüş lenger güneş

48- Şâh bezminde amel olmaga bu kavl-i garîb

       Ediniptir Zöhre-i zehrâyi hınyâ-ger güneş

49- Ey arûs-ı hüsnüne âyine meh zîver güneş

       Görünür aks-i cemâlinden cihân yek-ser güneş

50- San ki magribdir saçın k'anda gurûb eyler kamer

       San ki matla'dır yakan k'andan tulu eyler güneş

51- Tûtî-i ser-sebzdir k'âyinede per gösterir

       Hatt-ı ruhsârın kim olmuştur ana der-ber güneş

52- Bir gece düşümde sen mâhı der-âgûş eyledim

       Gördüm olmuş nûrdan bâlîn kamer bister güneş

53- Kim ki nezzâre kıla hurşîde haddin var iken

       Nâzırın çeşmine hışmından sokar hançer güneş

   54- ÖyküneIden yüzüne hergîz bakılmaz yüzüne

      Bî- hayâdır k'oldu bu vech ile müstahkar güneş

55- Okudum hattın lebinde kim gubâr-ı müşg ile

       Çeşme-i cân üzre yazmış Sûre-i Kevser güneş

56- Raks urur hengâme-i aşkında bir cân-bâzdır

       Kim olur zerrîn resenle asılıp çenber güneş

57- Bahr-ı gahmda görmedi mihrinden akan göz yaşın

       Pes neden dermiş Atâyî k'o)ldu dür-perver güneş

58- Göricek yüzünde zülfü'n rismânın sanırım

       Nûr ile yazmaga Şeh medhin çeker mıstar güneş

59- Husrevâ medh-i zamîrin nkr ederdim dün gece

       Tâlî oldu maşrık-i endîşeden enver güneş

60- Ebr-i gam var yoksa medhinde redif etmek degil

       Pertev-i zihnimden olurdu yedi kişver güneş

61- Nûr-ı mihrinden suvarıp şâhını eş'ârımın

       Gülşenimde ahter olurdu şükûfe ber güneş

62- Bir nazar kıl Ahmed'e ey nûr-i çeşm-i kâ'inat

       K'âb-ı Iûtfundan oluptur ebr gibi ter güneş

63- Tâ zümürrüd sebze-zârında sipihrin her seher

      Sâgar-ı pirûzeye döker mey-i aşfar güneş

64- Tâ yaza nûrın kalemle çin seher nakkâş-ı sun'

       Şemse-i zerrîn-i tak-ı gün bed-i ahzar güneş

65- Tâ Süreyyâ ıkdin eyler gûş-var-ı gûş-ı mâh

       Tâ Benât-ün-na'şa örter nûrdan çâder güneş

66- Çarh dürcünde konulan her murâdın gevherin

       Her gün etsin harc edip kapında hâk-i der güneş

67- Yazsın âsâr-ı süm-i esbin gubârî hatt ile

      Mâha tâ hayt-ı şu'a ile çeker mıstar güneş

68- Ömr-i hasmın defterin tûmâr-veş dürsün felek

       Nice k'ezâsından eyyâmın düzer defter güneş

Tarlan, Ali Nihat (hzl.) (1992). Ahmet Paşa Divanı. Ankara: Akçağ Yay. 64.

 Ahmet Paşa Hayatı

 Divanı

 Seçilmiş Şiirleri