Gazel
Hattun ol pîrûzedür kim la’l-i nâb üstindedür
Leblerün ol la’l kim dürr-i hoş-âb üstindedür
Yüzün üstinde vatan tutsa gözün olmaz aceb
Menzil-i Mirrîh ki dirler âfitâb üstindedür
Çeşm-i giryânumda ey dilber hayâli kaddünün
Bir nihâl-i tâzedür kim cûy-ı âb üstindedür
Kâmetüm ol dâle dönmişdür ki derd altındadur
Gözlerüm şol ayna benzer kim azâb üstindedür
Hâk ol ey dil pertev-i hüsninden istersen nasîb
K’âfitâbun tâbına menzil türâb üstindedür
Zülf ü ebrunı görenler dir hezârân âferîn
Ol mu’anber çetr kim müşkîn tınâb üstindedür
Ey Nizâmî vasla şâd olma vü hicrâna melûl
Kâ’inâtun hâli çünkim inkılâb üstindedür
İpekten, Haluk (hzl.) (1974). Karamanlı Nizâmî, Hayatı, Edebî Kişiliği ve Divanı. Ankara: Atatürk Üniversitesi Yay. 142.