KÂSÎDE-İ SÜNBÜL BERÂY-I VASF-I ŞEYHU’L-İSLÂM VELİYYÜDDİN EFENDİ
(Feilâtün Feilâtün Feilâtün Feilün)
1 Tûg-ı şâhî gibi îstâde ser-â-ser sünbül
Şâh-ı nev-rûza konakçılık eder her sünbül
2 Alemâsâ dikilip bâga çeker sâyesine
Ceyş-i ezhâr-ı çemen-zârı berâber sünbül
3 Revnak-ı bezm-i bahâr eyledi her bir varakın
Gösterir sâkı ile sâkîye sâgar sünbül
4 Dizdi kandîllerin düzüye mânend-i menâr
Sahn-ı pehnâ-yı çerâgâna verir fer sünbül
5 Yere düşmezdi ebed tekye-geh-i gülşende
Şeb-külâh olsa yâ mengûş-ı kalender sünbül
………..
9 Davet-i keyf-i şarâb eylemege gülşende
Mâ’î fincânların dehre bagışlar sünbül
10 Yemyeşil mevc-i yem-i ahzara döndükçe çemen
Atdı lîmân-ı bahâr evine lenger sünbül
11 Şevk ile kâ’im olup bâgda dil-bestelige
Kâkül-i şâhid-i ikbâlini ister sünbül
12 Kelle-i kande döner kâgıd-ı nîlî içre
Olsa yâd-ı leb-i şîrînine mazhar sünbül
13 Kâküle benzemege âh ne kanlar dökdü
Karn-ı haccâm gibi sînede yer yer sünbül
14 Hat-ı nev-hîzi olur âh-ı derûna bâis
Çıkar elbette benefşeyle berâber sünbül
………..
20 Şeyhu’l-islâm-ı asr yanî veliyyü’n-niamım
Zîr-i fetvâdaki imzâsına benzer sünbül
21 Alır ıtriyyeti hulkundan ezâhir-i bahâr
Zehr-i kahrından ölür ejder-i heft-ser sünbül
22 Bâg-ı dâd-ı himemden alabilse bir feyz
Nahl-i hurmaveş eder kaddini ber-ter sünbül
23 Kapsa nem feyz-i midâd-ı kaleminden bir kez
Hande eyler gül-i sad-berge musavver sünbül
24 Meşrebinden alıcak neş’e-i feyzi gülşen
Kıldı her bir kadehin lûle-i kevser sünbül
25 Revnak-ı bâg-ı himem ebr-i güher-rîz-i kerem
Oldu ezhâr zamânında birer ter sünbül
………….
30 Kilk-i vâlâ-eseri dehrin İmâdü’d-dîn’i
Sâyesi gülşen-i islâmda server sünbül
31 Nokta-i hattına teşbîhe hatâ nâfe-i müşg
Kerem ü lutfuna nisbetle muhakkar sünbül
32 Sünbülistân-ı hayâl eyledi levh-i kalemim
Yana yana çü bahâr oldu mükerrer sünbül
33 Gül gib nutkum eder gülşen-i bezmi pür-zîb
Veremez bâgçe-i sohbete zîver sünbül
34 İşte meydân-ı sühan gitmeyelim gülzâra
Var mıdır bâg-ı hayâlâtda sükker sünbül
35 Ben piyâz istemezem tarh-ı zemîn-i şire
Dilde hod-reste olur sihr ile açar sünbül
36 Harf kandîl ü satr sâk u maânî nükhet
Şirimin mısra-ı vâlâsına benzer sünbül
37 Erse feyz-i kalemim reşhası gülzâra olur
Kâmet-i sidre vü tûbâya berâber sünbül
38 Olmasa böyle açılmazdı riyâz-ı dilde
Bâd-ı âhımla perîşân u mükedder sünbül
39 Bir piyâzım yogiken yine zemîn-i tabım
Dehri tatîr edecek mertebe besler sünbül
………….
44 Âhım eflâke çıkıp sünbülede etdi karâr
Gayrı lâzım degil ister gül ü ister sünbül
45 Çıkdı evc-i felege dûd-ı derûnum yanarak
Oldu tâ şîşe-i nüh-târeme ber-ter sünbül
………..
48 Nev-bahâr-ı sühana erdi hazân-ı encâm
Haşmetâ geldi yerine yine lâgar sünbül
49 Tâ kopup bâgçe-i perverişinden her sâl
Şîşe-i dîde-i halka ola zîver sünbül
50 Gülşen-i adli bula revnak-ı bâd-ı tevfîk
Bezm-i câhına ola dûd-ı muanber sünbül
Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ