Kaside : Müjde ey keştî-nişîn-i bahr-ı hicr-i bî-girân
Oldı maksûda muvâfık rûzgâr-ı bî-emân
2.Müjde ey güm-kerde-râh-ı vâdi-i cevr ü sitem
İrişüp Hızr-ı hidâyet itdi kalbüñ şâd-mân
3.Müjde ey pejmürde-dil geldi Mesîh-i rûh-bahş
Şâd ol ey dil-haste cân irdi tabîb-i mihr-bân
4.Biñde birin idemez bu müjdegânınuñ edâ
Haşre dek olsa sabâya ebr-i nîsân dür-feşân
5.Bu peyâmı gûşına irgürse bâd-ı subh-dem
Bir tabak altun nisâr eylerdi verd-i gülsitân
6.Nakd-i cândur böyle peygâmuñ muhassal müjdesi
Niçeler şimdi sürûrından ‘aceb mi virse cân
7.Hayli demdür olmayup düzd-i havâdisden emîn
Çâr-sûy-ı dîn ü devlet bulmadı emn ü emân
8.Gayret-i Hak zâhir oldı geldi çıkdı ‘âkıbet
Hâdi-i râh-ı sa‘âdet Mehdi-i âhir-zamân
9.Neyyirüm kişver-güşâ a‘dâ-küş-i efser-rübâ
Behmen-i zerrîn-kabâ sâhib-kırân-ı kâr-dân
10.Âsaf-ı Cem-menkabet destûr-ı ‘âlî-menzilet
Hamletü’l-mülk -i fütüvvet dâver-i kişversitân
11.Kaht-rân-rezm ü Nerîmân-‘azm Behrâm-intikâm
Kahramân-kahr Sikender-kadr ü Dârâ-âsitân
12.Ya‘nî ser-dâr-ı cihân-sâlâr-ı haydâr-gîr ü dâr
Sadr-ı a‘zâm server-i ‘âlem vezîr-i kâm-rân
13.Ol süvâr-ı ‘arsa-ı ikbâl-i devlet kim olur
Gerd-i rahşı rûşenâyî bahş-ı çeşm-i ahterân
14.Nîze-i hârâ-güzârı ejder-i merdüm-rübâ
Nâvek-i a‘dâ-şikârı şâh-bâz-ı bî-emân
15.Âb-ı tîg-i bî-dirîgi cûy-bâr-ı bâg-ı dîn
Tâb-ı rûy-ı meh-fürûgı âfitâb-ı âfitâb-ı ‘izz ü şân
16.Bârekallah dâver-i Dârâ der-i Cem-bârgâh
Levhaş-allah sadr-ı vâlâ-kadr-i Keyhüsrev-nişân
17.Oldı yümn-i himmetüñle tîg-i fitne der-niyâm
Eyledüñ çün kim hüsâm-ı ihtimâmı der-miyân
18.Râst gelmez atlas-ı gerdûn kad-i ikbâlüñe
Gerçi her şeb çırpılar anı şihâb-ı âsumân
19.Kâse-i zerrîn-mâhı çenber-i çarha koyup
Döndürür bezmüñde lü‘bet-bâz gerdûn her zamân
20.Şâh-râh-ı devletüñde mâh-ı bedr ile felek
Sâ’il-i cûduñ olup gûyâ tutar destinde nân
21.Sürmese toprak-sevâd-ı Şâmdan re’yüñle ger
Almaz idi kal‘a-ı eflâki şâh-ı ahterân
22.Pîlinüñ gûşı kulak sürfe ola bagrı kebâb
Gelse bezm-i rezmüñe ger hâkim-i Hindûsitân
23Keştî-i hâki yürüdür bâd-bân-ı hargehüñ
‘Azm-i râh itdükce eylerseñ nola tayy-ı mekân
24.Âşiyân-ı murg-ı nusretdür koluñda her siper
Şâh-ı gülistân-ı himmetdür elüñde ol Sinân
25.Gâh yaprak geh kelem işler fezâ-yı cengde
Nahl-ı cism-i gülşene ol tîg-i tîz-i cânsitân
26.Atduguñ düşmez yire murg-ı hümâdur nâveküñ
Bu ‘acebdür kim dil-i a‘dâda eyler âşiyân
…………..
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994