Ķaśįde-yi Fehįm Dernat-ı Ĥażret-i Cenāb-ı Risālet Śallalāhu ǾAleyhi ve Sellem
Ķaśįde-yi Fehįm DernaǾt-ı Ĥażret-i Cenāb-ı Risālet Śallalāhu ǾAleyhi ve
Sellem
FāǾilātün / FāǾilātün / FāǾilātün / FāǾilün
1. Mihr ü meh kim devr iderler Ǿālemi her rūz u şeb
Devr-i nāhemvār-ı eflāke gülerler rūz u şeb148
2. Mihr ü mehle bu pelengį-hū sipihr-i kįne-cū
Bir ġażanferdür ġıda eyler iki ser rūz u şeb
3. Mihre düşmendür meger meh kim hilāl ü bedrden
Gāh gürz eyler ĥavāle gāh ħançer rūz u şeb
4. Mihr ü meh śanma felek bįm-i ħadeng-i āhdan
Eksük itmez kellesinden iki miġfer rūz u şeb
5. Cürm-i mihr ü meh degül çarħ üzre bir āyįnedür
ǾĀrż iderler dehre ĥüsnin iki dilber rūz u şeb
6. Mihr ü meh mi şuǾle-yi dūd-ı dil-i Ǿāşıķ mıdur
Ney ki bu manžūr olan cirm-i münevver rūz u şeb
7. Mihr ü meh śanma şerār-ı dūd-ı āh-ı Ǿāşıķān
Dāġdār itmekdedür eflākı yer yer rūz u şeb
8. Mihr ü māh-ı nev gibi zerd ü nizār-ı Ǿışķ olan
Çarħı ǾĮśāveş ider bālįn ü pister rūz u şeb
[58a] 9. Mihr ü meh śanma şikār içün bu vaĥşetgāhda
Pįşe-zārın devr ider iki ġażanfer rūz u şeb
10. Mihr şāh-ı rūşenādur māh serdār-ı nücūm
Ħayl-i aħterden iderler cemǾ-i leşker rūz u şeb
11. Mihr ü mehle āsmān bir sįne-sūz ābdāldur
Kim ŧurur pehlū-yı pür-dāġında aħker rūz u şeb
12. Başını kes mihr ü māhuñ Zü’l-fikār-ı tįġle
Śaf-şikāf-ı düşmen ol mānend-i Ĥaydar rūz u şeb
13. Mihrine aldanma çarħuñ baķma şekl-i māhına
Perde-yi çeşmüñde de olsa muśavver rūz u şeb
14. Mihr ü mehden eyleyüp peymāne rūşen-meşrebān
Raġmına eflāküñ eyler nūş-ı sāġar rūz u şeb
15. Mihr ü meh kim iki güldür zįnet-i destār-ı çarħ
Çoķ şeh-i devrāna oldı zįb-i efser rūz u şeb
16. Mihr ü mehle çarħ-ı mįnā-fām bir baĥr oldı kim
İki nįlūfer virür ol baĥr-ı aħđar rūz u şeb
17. Rūşen olsa mihr ü mehden de n’ola ol sįne kim
Cilvegāh ide anı dįn-i Peyamber rūz u şeb
18. Ol Peyamber kim żiyā-yı nūrıdur mihr ü mehe
Tįre-tįh-i tįregįden nūra rehber rūz u şeb
19. Mühr-i eflāk-ı nübüvvet māh-ı levĥ-i ıśŧıfā
Aĥmed-i Mürsel kim Ǿālem naǾtın eyler rūz u şeb
20. Mihr ü mehden śanma feyż-i ħāk-ı pāyıdur anuñ
Kim olur pįr-i sipihrüñ ceybi pür-zer rūz u şeb
21. Mihre ŧaǾn itse meh-i rūyı Ǿaceb mi tā ebed
İtdi tenhā Ǿālemi pür-nūr yekser rūz u şeb
22. Mihr ü māh-ı Ǿadli olsa pertev-endāz-ı cihān
Tā śabāĥ-ı maĥşer olurdı berāber rūz u şeb
23. Görselerdi mihr ü meh ger şāhidān-ı Ǿİśmetin
Ĥacletinden olalardı ser becāver rūz u şeb
24. Didüm eflāke nedür bu mihr ü meh-nām iki gül
Būy-ı feyżi itmede dehri muǾaŧŧar rūz u şeb
25. Didi mihr ü meh degüldür ravżasından ol şehüñ
Ķudsiyān gerdān iderler iki micmer rūz u şeb
26. Mihr ü meh-rāya Ħudāvendā ŞefįǾü’l-Müźnibā
Ey ki ķalbüñdür cemāl-i Ĥaķķa mažhar rūz u şeb
27. Cürm-baħşā cirm-i mihr ü māhdan idüp siper
ǾÖźr idüp cürmin diler çarħ-ı sitem-ger rūz u şeb
28. Sensin ol kim mažhar-ı cūduñ olaldan mihr ü meh
Dehre sertāser olurlar sufre-güster rūz u şeb
29. Dehri Ǿaks-i rūyuñ itdi feyż-yāb-ı mihr ü meh
Pāyuña itse n’ola įŝār-ı gevher rūz u şeb
30. Mihr ü māh itmezdi sırr-ı nūr-ı evvelden žuhūr
Devr-i Ǿahdüñ olmasa eyyāma maśdar rūz u şeb
31. Mihri döndürdüñ yolından māhı itdüñ sįne-çāk
MuǾcizātuñ söylenür kişver bekişver rūz u şeb
32. Žılluñı Ĥaķ nūr-ı mihr ü mehde ķıldı taǾbiye
Olmasa sāyeñ n’ola ey rūĥ-peyker rūz u şeb
33. Mihr ü meh olsaydı ebr-i ķahruña mažhar eger
Dehre göstermezdi yüz tā śubĥ-ı maĥşer rūz u şeb
[58b] 34. Mihr ü māh ile felek bir sāǿil-i pür-ĥırśdur
İki kāseyle cenābuñdan ider cer rūz u şeb
35. Ĥasret-i nežžāre-yi mihr-i ruħuñla meh gibi
Cüst ü cū eylerdi žulmātı Sikender rūz u şeb
36. Ħuŧbeñe müştāķ mihr ü meh degül şāhā hemān
Teşnedür pā-būsıña bu heft-kişver rūz u şeb
37. Çihre-sāy-ı ħāk-ı dergāhuñ olaldan mihr ü māh
Her biri feyżiyle eyler ħāki gevher rūz u şeb
38. Nūr-ı mihr ü meh gibi kim žıllı eyler münhezim
ǾAskerüñ küffāra olmaķda mužaffer rūz u şeb
39. Mihr ü māha düşmen olmaġla ne var ħuffāşveş
Olsa bir köpek ne ġam Bū Cehl-i kāfer rūz u şeb
40. Nūr-baħş-ı mihr ü māh oldı nuķāŧı kilküñüñ
İtse naǾtuñ n’ola idrāk-i suħan-ver rūz u şeb
41. Levĥa-yı zer-kār-ı mihr ü māh-ı feyż-āŝārdan
Āyet-i naǾtuñ Fehįm itmekde ezber rūz u şeb
42. Mihr ü meh-feyżā benem ol berķ-i āteş-tābǾ kim
Feyż-i teǿŝįri ķażā ŧabǾumdan ister rūz u şeb
43. ŞāǾir-i rūşen-ħayālem mihr-ŧābǾam meh żamįr
Ġarķ-ı nūr olmaz mı ol kim medĥüñ eyler rūz u şeb
44. Bu ħuśūśa mihr ü meh iki güvāhumdur benüm
Kim cemālüñ mihridür ŧabǾumda mużmer rūz u şeb
45. Ħāŧırım ābisten-i śad-mihr ü mehdür gerçi kim
Eksük olmaz çeşm-i ŧūfān-zādan aħter rūz u şeb
46. Pertev-efrūz olsa yüz biñ mihr ü meh ħuşk eylemez
Ol ķadar dāmān-ı çeşmüm olmada ter rūz u şeb
47. Eylemem teǿŝįr-i mihr ü māhdan şekvā faķįr
Ġam yimem geçmekdedür ger ħayr u ger şer rūz u şeb
48. Bu ķaśįdem çarħ-ı maǾnį-nāmdur pür-mihr ü meh
ǾĀlemi devr itmede bį-çarħ u miĥver rūz şeb
49. Muĥtaśar eyle sözüñ ey dil çoġ olmaz mihr ü meh
Fāriġ ol taĥśįl-i ĥāśıldur mükerrer rūz u şeb
50. Tā ki mihr ü māhı örte geh küsūf u geh ħusūf
Tā ki her bār ola çün kāfūr u Ǿanber rūz u şeb
51. Mihr ü mehden de olursa ħāŧır-ı aǾdāñ ola
Çün sifālin-pāre meksūr u mükedder rūz u şeb
52. Mihr ü meh devr eyledükçe Ǿālemi her śubĥ u şām
Śad-selām olsun revān-ı pāküñe her rūz u şeb
Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012
