Ķaśide-yi Şeyħ Neşāŧi DernaǾt-ı Ĥażret-i Muĥammedü’l-Emįn

Ķaśide-yi Şeyħ Neşāŧi DernaǾt-ı Ĥażret-i Muĥammedü’l-Emįn ǾAleyhi’s-Selām

FāǾilātün / FāǾilātün / FāǾilātün / FāǾilün

1. Mihr ü meh ser-germ-i sevdā kim gezer her rūz u şeb

Sįm ü zer įŝār iderler dehre yek-ser rūz u şeb

2. Mihr ü meh kim iki sevdā ger seyāĥat pįşedür

ǾArż iderler āleme kāfür ü Ǿanber rūz u şeb

3. Mihr ü meh śanma baśar naķl-i kevāķıb bir ŧabaķ

Devr ider bezm-i felekde iki sāġar rūz u şeb

4. Mihr ü meh biri gül-i zerd ü biri nergis midür

Kim virirler gülşen-i eflāke zįver rūz u şeb

5. Mühre-yi mihr ü mehüñ gerdūn-ı derūn ĥaķķadan

Birini ižhār idüp birini gizler rūz u şeb

6. ŞemǾ-i mihr ü māha bįm-i gird-bād-ı āhdan

Şįşeden ser-pūş ider çarħ-ı sitem-ger rūz u şeb

 [82b] 7. Mihr ü mehden ħavfile iki ked ü bend eyleyüp

Baĥr-i ĥayretde felek olmış şināver rūz u şeb

8. Mihr ü meh mįzān-ı dehre olmış iki keffe kim

Vezn-i isfįdāc ider ki müşg-i ez fer rūz u şeb

9. Mihr ü māh-ı nev ki hemçün gūy u çevgāndur felek

Gösterir bāzįgeh-i dehr olduġun her rūz u şeb

10. Girde-yi mihr ü mehe bu tābe-yi pür-tābdan

Nārdur gūyā şafaķ encümdür aħker rūz u şeb

11. Mihre dāġın gösterir meh zerdi-yi rūyın görüp

Birbirine derd-i Ǿışķın Ǿarż iderler rūz u şeb

12. Gör śafā-yı Ǿışķı mihr ü meh bu sūz u dāġile

ǾĀleme olmaķda yine şevķ-güster rūz u şeb

13. Mihr ü meh olmaz mı böyle pertev-endāz-ı śafā

Olmasa ger mažhar-ı nūr-ı peyamber rūz u şeb

14. Ol şeh-i yektā ki mihr ü meh baśar üftādegį

Tā eźelden emrine olmış musaħħar rūz u şeb

15. Aĥmed-i Mürsel ki mihr ü māh tāb-endāz olur

Her kim eyler cān u dilden naǾtın ezber rūz u şeb

16. Mihr ü meh gibi hüveydā cebhesinde nūr-ı Ĥaķ

Sırr-ı ġaybı her ser-i mūyında mużmer rūz u şeb

17. Mihr-i şerǾ-i Ǿālem-efrūzile māh-ı Ǿadlidür

Eyleyen dünyāyı ser-tā-ser münevver rūz u şeb

18. Mihr ü meh śanma melāǿik nūrdan revzen açup

Ravża-yı cennet-nažįrįn seyr iderler rūz u şeb

19. Mihr ü meh gibi o vālā ravżada raħşān olup

Zįb-i baħş olmış kanādįl-i mücevher rūz u şeb

20. Mihr-i ŧabǾā meh żamįrā şerǾ-i pākündür senün

BāǾiŝ-i āsūdegi-yi ħalķ-ı yekser rūz u şeb

21. Sensin ol çeşm ü çerāġ-ı dehr kim śad mihr ü māh

LemǾa-yı feyżüñ yanında şemǾ-i bįfer rūz u şeb

22. Mihr ü mehden çarħ iki mirǿat-i śāf Ǿarż eyleyüp

Tābiş-i Ǿaks-i ruħ-ı pür-tābuñ ister rūz u şeb

23. Mihri yaķmış iştiyāķuñ māhı itmiş dāġdār

Ebrüñ aĥvāli perįşān u mükedder rūz u şeb

24. Mihr ü meh pervāne-yi şemǾ-i cemālüñdür senüñ

Devr iderler sūz-ı ber-dil dāġ-ı ber-ser rūz u şeb

25. Mihr ü meh feyżā cenābuñdan ricā-yı feyż ider

Yazmaġa naǾtuñ Neşāŧi-yi ŝenā ger rūz u şeb

26. Mihr ü meh gibi alur dünyāyı zįr-i pāyına

Nūr-ı feyżüñ kim ola bir fikre rehber rūz u şeb

27. Çarħ-ı nažma mihr ise ol ben meh-i tābendeyim

Peyrev-i kilk-i Fehįm olsam n’ola ger rūz u şeb

28. Ĥabbezā ŧabǾ-ı fehįm-ı ħoş-süħankim mihr ü meh

Nažmına itmekdedür įŝār-ı güher rūz u şeb

29. Merĥabā ĥāmem benim kim mihr ü meh bāfarŧ-ı şevķ

Çehre-sādur pāy-ı müşgįn naķşına her rūz u şeb

30. Levĥ-i mihr ü māha yazmaķdur bu naǾtı niyyetim

Eyleyüp elde şuǾāǾın ħāme-yi zer rūz u şeb

31. Rūşeni-yi nažmımı çün mihrü meh seyr eyleyüp

Enveri olsa Ǿaceb mi ħāk-ı bir ser rūz u şeb

32. Mihr ü meh pertev-niŝār-ı dehr olup tā kim ola

Birbirinden ki ziyāde ki berāber rūz u şeb

33. Mihr ü māh-ı nev gibi tā rūz-ı maĥşer ümmetüñ

Düşmen-i dįne çeke şimşįr ü ħançer rūz u şeb

Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012

Neşâti Şiirleri

Neşati Divanı

Neşati Hayatı