Ķaśįde-yi Şeyħ Neşāŧį DernaǾt-ı Ĥażret-i Nebiyy-i Ķureşį

Ķaśįde-yi Şeyħ Neşāŧį DernaǾt-ı Ĥażret-i Nebiyy-i Ķureşį ǾAleyhi’ś-Śalātu ve’sSelām187

MefāǾilün / FeǾilātün / MefāǾilün / FeǾilün

 [81b] 1. Gel ey bihįn güher-i kār-ħāne-yi tekvįn

Aķıt firāķ ile gözden cevāhir-i rengįn

2. Hücūm-ı ĥasret ile ķān ŧaşup derūnuñdan

Kenār-ı çeşmüñi laħt-ı cigerle ķıl tezyįn

3. Reh-i mecāzda tā ki bu laġziş-i bįcā

Daħı açılmadı mı dįde-yi ĥaķįķat-bįn

4. Düşer mi meşreb-i Ǿirfāna sen de inśāf it

Bu dil-ħarābi-yi ġaflet bu hįç-kāri-yi dįn

5. Ne ŧāǾatüñde śafā var ne ħaşyet-i yek-dem

Ne hevl-i şūziş-i maĥşer ne fikr-i rūz-ı pesįn

6. Miŝāl-i lāle siyeh-dilsin olmaduñ her giz

Benefşe gibi ħacāletle ser be-rūy-ı zemįn

7. Ne būd-ı dehr ile şād ol ne dil-ĥazįn ne būd

Bunuñla oldı olan rütbe-yi rıżāya ķarįn

8. Olursa ħūn ile ser-şār ġonca-yı ķalbüñ

Yine śafāyile ol gül gibi güşāde-cebįn

9. Tamām naķş-ı ber-āb olduġın bilen dehrüñ

Olur mı luŧf u sitemle güşāde vü ġam-gįn

10. Yine zevāli muķarrer degül mi fikr eyle

Cihānı mihr gibi eyleseñde zįr-nigįn

11. Firāz-ı evcede çıķsañ miŝāl-i tįr eger

İder seni yine bir gün zamāne ħāk-nişįn

12. Bürehne-ser mi degülsin śabāĥ-ı maĥşerde

Serüñde şemǾ gibi olsa efser-i zerrįn

13. Sütūn-ı ħayme gibi rāstdur o kim olmış

Bu ħāk-dān-ı fenādan çü ħayme dāmen-i çįn

14. Śaķın śafāyile işrāķ-ı dilden ayrılma

Ne lāzım Ǿārif iseñ güft ü gūy-ı meşşāǿįn

15. Dirįġ o Ǿömre ki źātuñ tefekkür eylemeyüp

Geçe ħayāl-i heyūla ile şühūr u sinįn

16. Yeter bu Ǿālem-i ħākide üstüħˇān-çįnį

Hümā-yı fikrüñi ķıl rū-be-rāh-ı Ǿilliyyįn

17. Ġubārını göze çek bir dür-i felek-ķadrüñ

Ki pestdür aña nisbet firāz-ı Ǿarş-ı berįn

18. Der-i saǾādet-i Şāh-ı rusül ki olmadadur

Hemįşe nāśiye-sā ħusrevān-ı rūy-ı zemįn

19. Penāh-ı Ǿālem ü Ādem Peyamber-i źįşān

Ħudāygān-ı felek bārgāhı Ǿarş-ı mekįn

20. ŞefįǾ-i küll-i ümem melce-yi heme-Ǿālem

Şeh-i sütūde-şiyem faħr-i Enbiyā-yı güzįn

21. Cenāb-ı Aĥmed-i Mürsel ki eylemiş Ħallāķ

Fürūġ-ı neyyir-i źātın żiyā-yı çeşm-i yaķįn

22. O nāzenįn-i dü-Ǿālem ki töhmet-i şirket

Ħızāne-yi Ǿademe sāyesinde ķıldı rehįn

23. Şeh-i melāǿike Ǿasker ki taħtıdur eflāk

Sezādur olsa güneş aña bāliş-i zerrįn

24. Yegāne şāriǾ-i vālā-güher ki źātından

O deñlü düşdi cihāna herās-ı şerǾ-i mübįn

 [82a] 25. Ki zühre-dāǿire-yi māhı eyleyüp pür-tāb

Ŧaġıldı rūy-ı sipihre celāl-i cel-i pervįn

26. Ġubār-ı reh-güźeri tūtiyā gibi merġūb

Kelām-ı feyż-eŝeri tende cān gibi şįrįn

27. ǾUluvv-ı ķadrini gör kehkeşān degül olmış

Derinde çarħ-ı kemer-beste bende-yi dįrįn

28. Hilāl ü bedr degül ħaśm-ı şerǾine gerdūn

Çeker gehi teber-i ħışm u gāhi ħançer-i kįn

29. Ħudāygāna sensin ki şemǾ-i źātuñla

Ĥarem-serā-yı dil ü cānı eyledüñ tezyįn

30. Nihāl-i ķāmet-i mevzūnuñ olmasa dehrüñ

Ne bāġı žāhir olurdı ne lāle vü nesrįn

31. Cihān-penāh-ı şehā āb-ı şerǾ-i pāküñdür

Fesād-ı şule-yi āşūbı eyleyen teskįn

32. Medār-ı her dü serāsın Ǿaceb mi dergāhuñ

Gezend-i fitneden olsa cihāna ĥıśn-ı ĥaśįn

33. ŚaǾādet ol sere kim baħt-yāb-ı devlet olup

Hemįşe dergeh-i vālāñı eyleye bālįn

34. O ķaŧre kim dökülür dįdeden firāķuñla

Olur mı aña bahā śad hezār genc-i defįn

35. O seng-rįze ki pā-māl-i reh-güźāruñdur

Bulursa ķadr ile lāyıķ bahā-yı dürr-i ŝemįn

36. Kerem-şiǾār-ı şehā mevķıf-ı taĥayyürde

O dem ki luŧfuñ ola Ǿācizān-ı ĥaşre ķarįn

37. Ķuluñ Neşāŧi-yi küstāħı da meded şāhım

Ķoma hücūm-ı ħacāletle şerm-sār u ġamgįn

38. Ħamūş-ı vaķt-i edebdür śaķın śaķın ey dil

Kef-i duǾāyı açup ķıl ħulūś ile amįn

39. Hemįşe tā ki süħan perverān-ı Ǿālem ide

Nevā-yı naǾt ile eflāki pür-śadā vü ŧanįn

40. Çerāġ-ı şerǾi olup tā ebed żiyā-güster

ǾAdū-yı dįnine śad-bār laǾnet ü nefrįn

Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012

Neşâti Şiirleri

Neşati Divanı

Neşati Hayatı