Kerem Redifli Kaside I Ahmet Paşa
Kaside Kerem 1
( Şeyhi'nin "Kerem " Redifli Kasidesine Nazire )
Ey muhît-i keremin katresi ummân-ı kerem
Bâğ-ı cûd ebr-i kefinden dolu bârân-ı kerem
Matla-‘ı subh-ı zafer mihr-i zekâ ebr-i hayâ
Felek-i izz ü alâ dâver-i devrân-ı kerem
3. Tâc-bahş-ı ser-i sultân-ı salâtîn-i cihân
Zînet-i taht u nigîn Hazret-i Sultân-ı kerem
Zıll-ı Hak Şâh Muhammed ki işiği göğünün
Kem-terîn ılduzı olur meh-i tâbân-ı kerem
Ayağı toprağıdur cevher-i iksîr-i hayât
Âsitânı tozıdur sürme-i a’yân-ı kerem
6. Açılur hulkı nesîmiyle gül-i gülşen-i cûd
Bezenür lutfı zülâliyle gülistân-ı kerem
Bahr-ı Ahzar ne-durur kulzüm-i cûdunda habâb
Katre-i feyzi nedür ebr-i dür-efşân-ı kerem
Bî-kıyâs olalı ihsânlarun iy hüccet-i cûd
Kâtı‘ oldı cedel-i hasmını bürhân-ı kerem
9. Kefi bir demde nisâr itdüği gencün öşrin
Haşre dek vezn idemez keffe-i mîzân-ı kerem
Ne melek-hûy meliksin dem-i lutfun ile
Kevseri cûd akıdur ravza-ı Rıdvân-ı kerem
Ne kerâmet kodı Hak zât-ı kerîmünde k’olur
Ayağun basduğı yir Çeşme-i Hayvân-ı kerem
12. Bulmasa nâm-ı şerîfünle şeref nâme-i cûd
Ebter olaydı kamu defter ü dîvân-ı kerem
Gün gibi saltanatun topı göğe ağsa ne tan
Sana sunıldı bu meydânda çü çevgân-ı kerem
Bahr-ı cûdun nice şerh ola k’anun reşhasıdur
Hâsıl-ı kân-ı sehâ mâye-i ummân-ı kerem
15. Saltanat hil‘atini kaddüne hayyât-ı felek
Râst biçmese açılmazdı girîbân-ı kerem
Ne kadar zer var ise dest-i zer-efşânun ile
Harf-i zer gibi perâkendedür iy kân-ı kerem
Sîm sûretde sitem şekline yazıldugıçun
Dağıdursın anı düşman gibi iy hân-ı kerem
18. Gök tenûrunda kuru kurs okınur mihr ile mâh
Hân-ı lutfunla firâvân olalı nân-ı kerem
Kâse-i hırs doyar sofra-i ihsânundan
Dest-i in’amun ile âm olalı hân-ı kerem
Mihr-i cûdun çemen-i lûtfa zer-efşân olalı
Gülşen-i dehri bezer nergîs-i bostân-ı kerem
21. Bûy-i hulkundan urur müşg gibi dem ki tutar
Hôş revâhıyla cihân bağını reyhân-ı kerem
Ahmed’ün gam makası kesdi dilin şem‘ gibi
Sana rûşen diyemez hâlini sultân-ı kerem
Sen Süleymânı ne dille öge bir mûr-ı za‘îf
Getüre nutka meger lûtfun ile anı kerem
24. Husrevâ pâreledi cevr eli sabrum yakasın
Dest-gîr olsa demidür bana dâmân-ı kerem
Midhatun bülbülini gam kafesinde koma kim
Hayfdur tûtîye zehr iy şekeristân-ı kerem
Ekremü’l-halksın iy vâsıta-i ıkd-ı kirâm
Her le’îmün sözin işitme budur şân-ı kerem
27. Kul hatâ kılsa n’ola afv-i şehenşâh kanı
Tutalım iki elüm kanda imiş kanı kerem
Umarım cürmümi gark itmeğe rahmet suyına
Mevc-i ihsânun ile cûş ide ummân-ı kerem
Bir kara toprağum ihyâ-yi memât itmek için
Yağsa cûdun bulıdından n’ola nîsân-ı kerem
30. Nice k’iklîm-i mürüvvetde geçe hükm-i vefâ
Nice k’eyvân-ı atâda dura dîvân-ı kerem
Nice k’insân ola âlemde abîdü’l-ihsân
Nice kim ola cihân tâbi-i fermân-ı kerem
Dest-i ihsânun ile yapıla bünyâd-ı sehâ
Pâye-i kadrün ile yücele eyvân-ı kerem
33. Nice kim Ka’be müsâfirlerini lutf-ı İlâh
Rahmeti hânına her sâl ide mihmân-ı kerem
Iyd-ı ferhundene kurbân ide a‘dânı felek
Sen ehibbâna buyur âb-ı sehâ nân-ı kerem
Ömr-i hasmun ire târîh gibi pâyâna
Nâmunı nâme-i ikbâl ide unvân-ı kerem
