MUKADDİME-İ GİRÎZ-GÂH-I BAHÂRİYYE
MUKADDİME-İ GİRÎZ-GÂH-I BAHÂRİYYEDİR Kİ GÂLİBÂ MEDHİYESİ İNŞÂ OLUNMAMAK GEREKDİR. LÂKİN GİRÎZGÂHI NÂDÎDE-BİKRDİR. DİKKAT Ü MÜTÂLAA BUYURULDUKDA MALÛM
OLUR
(Feilâtün Feilâtün Feilâtün Feilün)
1 Eser-i feyz-i bahâr etdi cihânı hurrem
Gülşen-i Adne şebîh oldu ser-â-ser âlem
2 Gülşenin her gülü bir sâgar-ı sahbâya dönüp
Oldu revnak-şiken-i sahn-ı tarab-hâne-i Cem
3 Halka-i mevce-i bûy-ı gül olup zencîri
Beste-i gülbün-i şevk oldu hezâr-ı pür-gam
4 Eser etmiş o kadar feyz-i rutûbet güle kim
Âb u tâbı Kızılırmag ile gûyâ tev’em
…………
8 Âb-ı huşk etmede vâdî-i rutûbetde hurûş
Oldu deryâ-yı Necef tana-zen-i cûşiş-i yem
9 Tab-ı şâir dahi cûş eyleyicek deryâ gibi
Bahr-i eşâra mevc-rîz-i rakam oldu kalem
10 Havfım oldur eser-i cûşiş ile bahr-i arûz
Keştî-i şire verir gavta-i girdâb-ı adem
11 Bahr-i evzâna dahi geldi takâzâ-yı hurûş
Tab-ı şâir nice eşâra yanaşır bilmem
……….
15 Şöyle âsâr-ı safâ rûy-ı zemîne sârî
Münakis âyîneveş hâke sipihr-i azam
16 Safvet-i arz o kadar kim nazar-endâz olsa
Görünür dîdelere aks-i kevâkib ol dem
17 Üstühânı sayılır gâv-ı zemînin bir bir
Sayılır mûyu bile dikkat ederse âdem
…………..
20 Ugrama rence gönül genc deyu âlemde
Bir defîne bilirim pür-dür-i yektâ-yı himem
21 Pertev-i subh-ı sehâ matla-ı hûrşîd-i atâ
Menhelü’l-azb-i vefâ Âsaf-ı ferhunde-şiyem
22 Nukre-i âtıfeti yâsemen-i ravza-i cûd
Zer-i lutfu gül-i nesrîn-i gülistân-ı kerem
23 Nefha-i nâtıkası revnak-ı eşcâr-ı merâm
Reşha-i kilk-i teri ebr-i güher-zây-ı hikem
Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ
