Gazel
Nâz ile itse ol sanem-i pür-hicâb raks
Eyler felekde âh iderek âfitâb raks
Pâ-bûs içün düşer niçe diller ayagına
Meclisde eyledükçe o mest-i harâb raks
Şevk-ı lebünle ey sanem-i cür'a-nûş-ı nâz
Eyler derûn-ı şîşede her bir habâb raks
Şâyed tahammül itmeye diller cemâlüne
İtme esîr-i gamzen olam bî-nikâb raks
Dil-teşnegân-ı zehr-i gamun ragbet eylemez
Bezminde her dem eylese câm-ı şarâb raks
Tîr-i müjenle âteş-i ışkunda dil döner
Sîh-i belâda eyler o murg-ı kebâb raks
Bir dil-rübâya düşdi gönül kim Nahîfiyâ
Eyler safâ-yı ışkı ile şeyh ü şâb raks