Ne fitnedür benün zülfün biri zengî biri Hindû

Ne sihr olur gözün gamzen biri ayyâr biri câdû

 

Kimün vardur senün gibi cihânda bir dahı dil-ber

Sanavber-kad münevver-had lebi hokka dişi incü

 

Boyı ar’ar semenber bir melek-manzar hatı anber

Saçı sünbül beni fülfül mu’attar-zülf ü müşkîn-bû

 

Sa’âdet ahteri togdı başuma dün gice cânâ

Ne tâli’dür bu tâli’ kim tulû’ itdükde sen meh-rû

 

Harîmî cân virem dirken işigün yasdanup cânâ

Nice gavgâ nice sevdâ getürdi başuma bu hû

Kılıç, Filiz (1996). “Osmanlı Hanedanında Bir Şair: Şehzade Korkut”. Ahmet Yesevi Üniversitesi Sosyal Bilimler Dergisi (2): 214.