PÂDİŞÂHIMIZ SULTÂN MUSTAFÂ EFENDİMİZ HAZRETLERİNE
ŞEHEN-ŞÂH-I KİŞVER-ÂRÂ HÂLÂ PÂDİŞÂHIMIZ SULTÂN MUSTAFÂ EFENDİMİZ HAZRETLERİNE TÂRÎH-İ CÜLÛS-I HÜMÂYÛNLARINI MUTAZAMMIN ARZ BUYURDUKLARI KASÎDE-İ BEÇÇEDİR Kİ ŞÂN-I BÜLEND-UNVÂN-I ŞEHEN-ŞÂHANELERİNE TAZÎMEN ZÎVER-İ SAHÎFE-İ NÜHUSTÎN KILINDI
(Mefâîlün Mefâîlün Mefâîlün Mefâîlün)
1 Mübârek ola tâc u tahtın ey sultân-ı çerh-evreng
Sana şâyeste Dârâ vü Sikender olmaga serheng
2 Sen ol düldül-süvâr-ı arsagâh-ı saltanatsın kim
Sezâdır gâşiye-ber-dûş-ı ikbâlin ola Hûşeng
3 Kudûmün verdi vüsat âleme şevketlu hünkârım
Küdûretle cihân ser-tâ-be-pâ olmuş iken dil-teng
4 Günü togdu gören zulmet-nişînân-ı şeb-i ye’sin
Cebîninde güneş gibi hüveydâ pertev-i ferheng
5 Sabâhü’l-hayr-ı nusret pertev-i vech-i hümâyûnun
Berîd-i avn-i Hak ceyş-i zafer-kîşinde pîş-âheng
6 Vücûdunla cihân pertev-pezîr-i tesliyet el-hak
Safâ-yı talatınla tab-ı âlem cümle şûh u şeng
7 Makâm-ı saltanat zâtınla reşk-i evc-i alâdır
Hicâz u Isfahân sît-i kudûmün ile sîr-âheng
8 Küşâyiş vermese tab-ı zamâna feyz-i teşrîfin
Olurdu ıztırâbından cihân burka-şikâf-ı teng
9 Mükâfât eyledi Bârî vücûdun ile dünyâya
Terâzû-yı kaderde kabz u bast olmakda dengâ-deng
10 Sen ol sâhib-kırân-ı dîn-perver kişver-ârâsın
Edersin tâk-ı arş-ı iştihâra seyfini âveng
11 Girip bostân-ı rezme mîve-çîn-i nusret oldukça
Ser-i maktû-ı düşmen dest-i tîginde olur nâreng
12 Şakâyık-zâr-ı adne döndürürdün mülk-i adâyı
Sulansa âb-ı tîg-i himmetinle arsagâh-ı ceng
13 Çalıp çâk etmede darb-ı fetihle sadr-ı adâyı
Olur mızrâb-ı seyfin gûyiyâ perde-nüvâz-ı çeng
14 Sen ol gîtî-sitân-ı dîn-i Ahmed’sin olur elbet
Esîr-i bâb-ı ikbâlin kırâl-ı mülket-i Efreng
15 Yed-i te’yîdinin mevrûsudur ahz-ı kırâl etmek
Hudâ kâdir ne dem azm-i gazâya eylesen âheng
16 Tutup çâsâr-ı Moskov’u cenâb-ı vâlidin çün kim
Senin de bend-i fitrâkinde bir çâsâr olur âveng
17 Dilin bir kulzüm-i pür-gevher-i cûd u gınâdır kim
Nigâh-ı itibârında cevâhirle müsâvî seng
18 Der-i cûdunda istitâ eden sâ’illerin oldu
Yedinde kâse-i deryûze-kârı efser-i Hûşeng
19 Hoş-âmedci degil tabım efendim şâirim gerçi
Benim gibi sühandâna yakışmaz lehçe-i serheng
20 Hilâf etmem sözümde rûyunu gördükçe vallâhi
Silindi levh-i dilden feyz-i şevk ile sevâd-ı reng
21 Efendim bârekallâh pâdişâh-ı âlem-ârâsın
Gören vech-i hümâyûnun bu tarza eyledi gül-bang
22 Olur behcet-nümâ rûy-ı makâsıd her yere baksan
Zamân-ı devr-i Sultân Mustafâ’dır geçdi vakt-i teng
23 Degil dilden küdûret belki berden ref olup gitdi
Zemîn âyîneveş âyîne-i gerdun ile yek-reng
24 Görülmüş mü aceb taht-ı cihânda böyle bir sultân
Bu heft-evreng-i çerhi başlayalı devre heftû-reng
25 Dil ol ressâm-ı nakş-endâz-ı vasf-ı padişâhî kim
Geçinsin sâye-i kilkimde Haşmet Mânî vü Erjeng
26 Demeden bir ahad dedim bu târîhi duâ-gûne
Mübârek ola Sultân Mustafâ’ya efser ü evreng (1171)
Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ
