Şem‘-i bezm-i şu‘legâh-ı vahdetüñ pervânesi
29.07.2017
Fâ‘ilâtün Fâ‘ilâtün Fâ‘ilâtün Fâ‘ilün
1. Şem‘-i bezm-i şu‘legâh-ı vahdetüñ pervânesi
Olmaz ey dil kârgâh-ı hikmetüñ pervânesi
2. Olsa pervâza göñül âmâde pür-pervândur
Himmet itmez sanma sıdk-ı niyyetüñ pervânesi
3. Şevke-i gül-nahl-ı ikbâle dırâz-engüşt olan
Olamaz ‘âlemde şân u şevketüñ pervânesi
4.4 Gerçi kandîl-i muhârib kılup olmaz cenî
Kala mı bî-nûr o rûşen-tıynetüñ pervânesi
5. Şeb-çerâg-ı küngür-i devlet söner mi bâddan
Feyz alur Rûhu’l-kudüsden devletüñ pervânesi
6. Hem-nefesdür rûh-ı Cibrîl ile ‘Ankâ-yı himem
Rûh-ı Rıdvândur riyâz-ı Cennetüñ pervânesi
7. Konmasa fânûs-ı himmet fark-ı şem‘-i devlete
Olmaz elbet meclis-i ünsiyyetüñ pervânesi
8. Serd-diller germi-i ervâhdan mahrûmdur
Hûn germândur bu ser-i germiyyetüñ pervânesi
9.9a Şu‘le-zâdur çün fetîl-i şem‘a-i revgan-nedân
Kayddan âzâdedür bu Neş’etüñ pervânesi
10. ‘Âdetü’s-sâdât çünki sâdetü’l-‘âdâtdur
‘Ârif iseñ ola gör bu ‘âdetüñ pervânesi
11. Şems-i Tebrîzî olur Tebrîz-i teb-lerze-keşân
Ya‘ni Mevlânâ-yı ‘âlî-himmetüñ pervânesi
12. Neş’et-i uhrâya eyle âhirü’l-emr i‘tibâr
Evvel âhir olma gel bu Neş’etüñ pervânesi
13. Hakkdan ister bîm-i dil yohsa bu vahşetgâhda
‘Ârif-i billah degül bu Neş’etüñ pervânesi
14. Sîme-divâr-ı kadîm-i mescide olma helâk
Ne hemîn olsun medâr-ı vahşetüñ pervânesi
15. Rîze rîze ol sanev-ber şekl-i hûnîn-fâmdan
Âb u reng âl olasın tâ vahdetüñ pervânesi
16. Hırka-i peşmîne-i şevki vesahnâk eyleme
Gâlib âsâsında ol bu kisvetüñ pervânesi
17.17b İste Mevlânâ yüzinden semme vechu’llah yüzin
Tâ olasın hân-kâh-ı fıtratuñ pervânesi
18. Hazret-i Neş’et Efendiye idüp hafz-ı cenâh
Olma gayrı Kâniyâ şu neş’etüñ pervânesi
Dr. İlyas YAZAR , K Â N Î D Î V Â N I, Ankara 2012
