05.04.2016
Gazel
[Fe’ilâtün Fe’ilâtün Fe’ilâtün Fe’ilün]
‘Âşık oldur kim ide cânını cânâna fedâ
Nite kim şem’e ider kendüyi pervâne fedâ
İtse ‘âşık nola cânânına cânını revân
Aglamaz ger ola bülbül gül-i handâna fedâ
Ne sa’âdetdurur ol ‘âşıka kim kendüzini
Eyleye ‘aşk-ıla cânâne gibi câna fedâ
Kan bahâdur yedügi kanda yise cümle sipâh
Tâ ki ceng üzre olalar reh-i sultâna fedâ
Nazmiyâ dil düşüren pîre-zen-i dünyâya
İdemez dîn yolına kendüyi merdâne fedâ
Yrd. Doç. Dr. Sibel ÜST, EDİRNELİ NAZMÎ DÎVÂNI (İNCELEME-METİN) T. C. KÜLTÜR VE TURİZM BAKANLIĞI, 2012 www.kulturturizm.gov.tr
0
0
Yorum Yapmak için Kayıt Olun veya Giriş Yapın