Bahâriye Der-Sitâyiş-i Şeyhü’l-islâm Yahyâ Efendi
08.04.2016Bahâriye Der-Sitâyiş-i Şeyhü’l-islâm Yahyâ Efendi
. . - - / . . - - / . . - - / . . –
1.Mülket-i bâga irüp peyk-i şitâbân-ı nesîm
Eyledi gülleri şen müjde-i pinhân-ı nesîm
2.‘Ömr-i ‘ayyâr gibi goncayı açsun da görüñ
Bu kadar bergi nice gizledi enbân-ı nesîm
3.‘Aks-i gülbinle sular perde-keş-i zıll-ı hayâl
Düm-i tâvûsı ‘ayân eyledi cevlân-ı nesîm
4.Jâleden gördi ‘arak-rîz gül-i gülzârı
İtdi hidmetler aña mervaha-cünbân-ı nesîm
5.Sahn-ı gülzâra gelüp eyleye mahfî gül-geşt
Şâh-ı gülden tuyılur makdem-i sultân-ı nesîm
6.Tokınup gûş-ı gül-i bâga pür-âteş itdi
Vaz‘-ı âşufte vü güftâr-ı perîşân-ı nesîm
7.Çîn’den geldi ‘Atâyî yüki hep ‘ıtr-ı ‘abîr
Yaydı kâlâsını sûdâ-ger-i dükkân-ı nesîm
8.Cûy-ı dil-cûda habâb oldı nigeh-bân-ı nesîm
Baş göz itse ‘aceb mi anı ihsân-ı nesîm
9.Gird-bâd ile çıkup bûy-ı bahâr eflâke
Virdi âfâka ziyâ micmere-gerdân-ı nesîm
10.Açılup güller olur berg-i menefşe perrân
Revnak-efrûz-ı nebât oldı meges-rân-ı nesîm
11.Beni teklîfe gelüp itse ferâmûş nola
Bâgda nergis ü gül olalı yârân-ı nesîm
12.Bülbüli mâ’il ü servi mütemâ’il eyler
Nakş-ı nev-beste-i gül nermî-i elhân-ı nesîm
13.Cûlara oldı sabâ silsile-cünbân-ı cünûn
Kıldı ser-geşte habâbı yine devrân-ı nesîm
14.Dil-i şeydâ-yı ‘Atâyî’ye nümûne besdür
Vaz‘-ı mestânesi çün hâl-i perîşân-ı nesîm
15.Hem-dem olmagıla üstâd-ı Mesîh-enfâse
Cândan oy virdi yine kâfiye-sencân-ı nesîm
16.Bûy-ı hulkıyla bahâr-ı kerem ü ihsânı
‘Itr-ı hoş-lahlaha-ı ceyb-i girîbân-ı nesîm
17.Rûzgâra şeref ol nefha-ı cân-bahş iledür
Devlet-i güldür olan revnak-ı devrân-ı nesîm
18.Bahr-i lutfından eger katreye fâ’iz olsa
Sîm-i sâfîden ola günbed ü eyvân-ı nesîm
19.Muttasıl ‘âleme ser-çeşme-i eltâfı revân
Çün nüvâziş-geri-i bî-had ü pâyân-ı nesîm
20.Nev-be-nev hande kıla berg-i gül-i ikbâli
Dem-be-dem tâ ki ola güllere ihsân-ı nesîm
21.Tâcını kapdı urup dîde-i ezhâre gubâr
Gonçanuñ ceybini çâk eyledi düzdân-ı nesîm
…………..
Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994
0
0
Yorum Yapmak için Kayıt Olun veya Giriş Yapın