Camiü’l-Buhur’dan
Acem şâhı Muhammed Hudâ-bende dergâh-ı pâdişâhîye bende-i ser-efkende olup cenâb-ı şehryâra ve oglı cânibinden şeh-zâde-i nâm-dâra pîşkeş çekildügidür
İlçiler gönderüp Acem şâhı
Eyledi bûs hâk-i dergâhı
Tehniyet kıldı sûr-ı sultânı
Pîşkeş çekdi hem firâvânî
Evvelâ heykel-i Kelâm-ı Kadîm
Şeş-kalem bir hediyye pür-tekrîm
Sâniyâ Mushaf-ı murassa-cild
Hat-ı Yâkût ile musanna-cild
Hep Aliyy-i Velî münâcâtı
Ol kerem kânınun ibârâtı
Biri dahi kitâb-ı Şeh-nâme
Şâh Mahmûd'a sanat-ı hâme
Nice yüz meclisi müzehheb idi
Zîb ü zînet kamu müretteb idi
Bir dahi Ceng-nâme-i zî-şân
Evvel âhir hutût-ı üstâdân
Biri dahi Hulâsatu'l-Ahbâr
Cild ü hattı müzehhebü'l-âsâr
Bir dahi Hamse-i Nizâmî idi
Nakş-ı Bihzâd anun tamâmı idi
Siyyemâ bir kitâb-ı nâdire-hat
Zehebî-satr u lâceverd-nukat
Vasatı Seba nazm-ı Câmî'den
Hâşiye Hamse-i Nizâmî'den
Gösterürdi o Hamse ol Seba
On iki fen letâyifin taba
Bir dahi külliyât-ı Kirmânî
Dahi Sultân Hüseyn dîvânı
Nazm-ı Türkî Sikenderî-nâme
Meclis ü hattı behre Acâm'a
Dahi dîvân-ı Hâfız-ı Şîrâz
Ser-be-ser Mihr ü Müşterî-pervâz
Bir dahi nazm-ı Leylî vü Mecnûn
Kıssa-i Yûsuf ile pür-bîrûn
On sekiz pâre idi cümle kitâb
Her biri tuhfe-i ulü'l-elbâb
Levhalar hod bütün bütün yârî
Sun-ı Bihzâdî meclis âsârı
Cümlenün hattı hatt-ı üstâdân
Nesh u talîk nâdirü'l-akrân
Degdi nevbet kumâş u esbâba
Bunlarun vasfı sıgmaya bâba
Hele bazısın idelüm tahrîr
Fehm ü idrâki tâ kim ola yesîr
Çekdiler hem tokuz ser-â-ser şib
Üç miyân-bend-i zer-keşî pür-zîb
On sekiz atlas on sekiz kemhâ
Hem tokuz Yezd kutnîsi alâ
Yedi kalîçe cümle bî-sânî
Kimi Yezdî kimi Horasânî
Nemed-i heft-reng bir kıta
Mîzer-i ehl-i neng bir kıta
Yanî dervîşüz itmezüz inkâr
Mîzer ile nemed disâr u şiâr
Bir yapuk çekdiler dahi zer-kâr
Oldılar pâdişâha gâşiye-dâr
Dahi bir perde çekdiler zer-beft
Perde kim seyr iden ulü'l-elbâb
Hayretinden kalur verâ-yı hicâb
Dahi bir hokka-i murassa-ı hâs
Toptolu pâd-zehr-i hâssü'l-hâs
Madenî mûmyâsınun adedi
Olmuş idi kamu yigirmi yedi
Dahi fagfûrî üç büyük kâse
Nimeti kimsede komaz tasa
Çünki bu denlü tuhfe-i nâ-yâb
Kıldılar pâdişâha arz-ı hisâb
Mîrzâ Hamza bin Hudâ-bende
Dergeh-i husreve olup bende
Ol dahi sûrı tehniyet kılmış
Hıdmetin bâis-i şeref bilmiş
Bir müzehheb büyük Kelâm-ı Kadîm
Vâcibü'l-ahz u lâzımu't-tekrîm
Cildi pür-cevher-i girân-mâye
Taşına içi zîb ü pîrâye
Cöng-i eşâr Mîr Alî hattı
Andan ol serverün celî hattı
Câ-be-câ ol dahi musavver idi
Hâsılı hayli rûh-perver idi
Bir dahi Hamse-i Nizâmî dürüst
Zîb ü zînetde çün kitâb-ı nühust
Bad-ez-ân ilçi-yi Hân İbrâhîm
Kıldı dergâh-ı Kabesin telsîm
Çekdi ol dahi bir Kelâm-ı Kadîm
Dahi bir Şâh-nâme nazm-ı Hakîm
Dahi kâlîçe iki cüft harîr
Hem yedi kabza bî-niyâm şemşîr
Dahi bir top katîfe fersâyî
Dahi bir kaç kumâş-ı dârâyî
Çekdiler hep bu denlü pîşkeşi
Gördiler pâdişeh-i mâh-veşi
Anlara çıkdı hılat-ı zerrîn
Hem ziyâfetle buldılar temkîn
https://www.turkedebiyatiisimlersozlugu.com/index.php?sayfa=detay&detay=943 (Arslan, 1999: