Hayali Bey ve Seçilmiş Şiirleri

Gazel- HAYALİ BEY

Eğerçi kim cigerler kanıdır aşk
Bana sor kim ne canlar cânıdır aşk

Sa'adet mülkü şâhı bir gedâsı
Melãmet tahtının sultânıdır aşk

Bugün gülzârıdır merdân-ı derdin
Tekellüf ehlinin zindânıdır aşk

Cüneydin Bâyezidin hun-ı dilden
Elinde sübha-i mercânıdır aşk

Hayâlî gâh olur sultân benem der
Ki anın bende-i germânıdır aşk

 

Gazel- HAYALİ BEY

Yâr ile hem-halvet ol cisminde cânın duymasın
Hâlet-i aşkı hikâyet kıl zebânın duymasın

Ger dile bir nâvek ursa ol kemân-ebrû sakın
Zahm-ı tîrin görmesin bağrında kanın duymasın

Kâkülünde nice yıl dil mürgü kılsın nâleler
Ârızında turra-i anber-feşânın duymasın

Hâkte olsun Hayâlî sayenin hem-sâyesî
Bile seyrân eylesin serv-i revânın duymasın

 

Gazel- HAYALİ BEY

Aşk bir şem'i ilâhidir benem pervânesi
Şevk bir zencirdir gönlüm anun dîvânesi

Kanda bilsin şâh-ı aşkın dergehi âdâbını
Kûh-ken bir dâğ eri Mecnûn yaban dîvânesi

Kell-i uşşâk satılamaz kesâdı var kati
İşlemez oldu mahabbet şehrinin ser-hânesi

Murg-ı dil dâ'im hevâ-yi aşk ser-gerdânıdır
Bülbülün gülzârı var bûmun olur vîrânesi

Sâgar-ı Cemde bu beyt-i dil-güşâ mersûm imiş
Ateş-i bâdeyle germ â germ iken kâşânesi

Rind oldur kim götürdü bezm-i kesretden ayak
Sâkî-i devrân elinden dolmadan peymânesi

Şîr ü şekker gibi alıştı Hayâlînin bugün
İltifât-ı Şâh ile bu vaz'-i dervîşânesi

 

GAZEL

(fâ i lâ tün/ fâ i lâ tün/ fâ i lâ tün/ fâ i lün)

Bülbül-i gülzâr-ı mihnetdir dil-i gamnâkimiz
Ana gûyâ kim kafesdir sîne -i çâkimiz

Fürkat öldürse beni âhım yeliyle haşre dek
Gird-i bâd olup ser-i kûyun dolanır hâkimiz

Varmışız bir mâh-rû şevkiyle gayrı âleme
Dûd-ı âh-ı pür-şererdir encüm-i eflâkimiz

Her boyu servin düşüp ayağına yüzler sürer
Bir akar sudur bizim gûya ki kalb-i pâkimiz

Bulmayaydın ehl-i nazm içre Hayâlî imtiyâz
Dûr-bîn olmazdı böyle dîde-i idrâkimiz

 

Gazel- 

(me fâ î lün/ me fâ î lün/ me fâ î lün/ me fâ î lün)

Ciğer hûnâbesin nûş etmeği aşk içre benden sor
Hadîs-i lâ'l-i Şîrîn-zebân-ı Kûhkenden sor

Mahabbet cûyibârı kim ser-i âşık habâbıdır
Geçit vermez anun yolunu başından geçenden sor

Peleng-efken gözün havfile ol şirâne gamzenden
Ne kanlar yuttuğun âhû-yı Çîn müşg-i Hotenden sor

Hayâlin şahı gam ceyşin çekip dil mülkünü yıktı
Eğer teftîş-i zulm etsen şehâ ehl-i vatandan sor

Hayâlî tabhını şâir geçenlerden su'al eyle
Hücûm-ı şâhbâzı bir nice zâğ u zegandan sor

 

GAZEL

(me fâ î lün/ me fâ î lün/ me fâ î lün/ me fâ î lün)

Dilâ Mecnûn-sıfat uryân-ı aşk ol pîrehenden geç
Belâ meydânının gerçek şehîdiysen kefenden geç

Yürü her serv-i bâlâya akıtma su gibi gönlün
Fenâ gülzârının el çek gülünden gel dikenden geç

Çekilmiş dûd-i hasrettir bu bağın serv-i dilcûsu
Dökülmüş zehr-i mihnettir ruh-ı hâke çemenden geç

Gönül şehbâzını sîmurg-ı Kâfa hem-cenâh eyle
Bu alçaklara pervâz eyleyen zâğ u zegandan geç

Hayâlî câme-i zer-beft ü atlastan olup fâriğ
Libâs-ı müste'ârîden geçip belki bedenden geç
 

 

GAZEL - HAYÂLÎ BEY

Nedür cân kim anı sen nâzenîn cânâna virmezler
Sana âşık olanlar yoluna cânâ ne virmezler

Lebi sevdâsı gönlümde yaraşur zâhidâ yârun
Bu bir lâ’l-i musaffâdur anı her kâna virmezler

Harâbât erleri bir sengi bâlin itseler anı
Serîr-i devlet üzre mesned-i sultâna virmezler

Zelîhâsın şu kim tuğyân-ı nefsinden cüdâ kıldı
Anun Mısr-ı vücûdı Yusufın zindâna virmezler

Hayâli ışk-ı Leylâya heves kıldun velî anı
Belâ deştine her Mecnûn-ı ser-gerdâna virmezler
 

Gazel / Eyleyem

Ben bir ednâ cür'adan kim aklı bî-hûş eyleyem
Vây eger bezm-i mahabbetde kadeh nûş eyleyem

Acı yaş dökdükde çeşmüm üstüne zahmum dedi
Sanma ey hem-dem nemek haklan ferâmuş eyleyem

Eylesem merguule-i zülfün görüb bir gulgule
Ey nice bülbülleri gül-şende hâmûş eyleyem

Cûy-bâr ey serv ayagun öpse dûd-ı âh ile
Çeşme-i Hayvan gibi anı siyeh-pûş eyleyem

Ey Hayâli her bahâr-ı hüsne karşu nice bir
Bulanub ırmağ-veş deryâ gibi cûş eyleyem

 

Gazel / Oldular

Lâleler sahn-ı gül-istânda kadeh-nûş oldular
Güft-ü-gûy-i bülbüle güller kamu gûş oldular

Üstühân-i sineden emvâc peydâ etdiler
Her riyâzet ehli bir deryâ-yi pür-cûş oldular

Hakkı biz bulduk deyu zann etmesün ashâb-ı kaal
Cûylar çün erdiler deryaya hâmûş oldular

Askeri nefs ü hevâya çekdiler âhı livâ
Halka halka dâglar birle zırıh-pûş oldular

Ben Hayâli bir şikârın alıcı şeh-bâz idüm
Kapdı serverler beni nâ-geh karakuş oldular

 

GAZEL

(fâ i lâ tün/ fâ i lâ tün/ fâ i lâ tün/ fâ i lün)

Sen yüzü gülsün cihân gülzârı zindândır bana
Halk-ı âlem gül gibi her gece handândır bana

Gamzenin cellâdını gönder ki teslîm eyleyem
Çün hicâb olan arada ey sanem cândır bana

Rûz-ı hecrinde beni tenhâ görelden dostum
Müstedâm olsun gamın her gece mihmândır bana

Terkin urdu deyu iğvâ eylemiş bî-dîn rakîb
Sevdiğim vallâhi billâhi bu bühtândır sana

Ey Hayâlî çekmezem firdevs-i ferdâ gussasın
Kim bu gün cennet cihânda vasl-ı cânândır bana
 

Hayali Bey TÜM Şiirleri

• Gazel- Cihân-ârâ cihân içindedür
• Ol gün kanı ki gün gibi sûzân idüm sana
• Bir âleme ermiş durur erbâb-ı harâbât
• Başumda mûy-ı jülîde tenümde taze dâgum var
• Gazel- Eğerçi kim cigerler kanıdır aşk
• Yâr ile hem-halvet ol cisminde cânın duymasın
• Harâb olupdur ol âbâd gördüğün gönlüm
• Hatt-ı miskînüñ lebüñde anber-i sârâ satar
• Aşk bir şem'i ilâhidir benem pervânesi
• Bî-vefâdır gül ol ey bülbül çemenden bir yana
• Bülbül-i gülzâr-ı mihnetdir dil-i gamnâkimiz
• Cânı teslîm eylemek aşkında kârımdır benim
• Ciğer hûnâbesin nûş etmeği aşk içre benden sor
• Dilâ Mecnûn-sıfat uryân-ı aşk ol pîrehenden geç
• Ey gönül hâlimi derdinle diğer-gûn ettin
• Elinden görmedik hiç bir belâ mı kaldı âlemde
• Nedür cân kim anı sen nâzenîn cânâna virmezler
• Dem nü var kanlu yaşum çihreme yol eylemeye
• Âyine her gün koyar dil-dârı tenhâ koynuna
• Ben bir ednâ cür'adan kim aklı bî-hûş eyleyem
• Lâleler sahn-ı gül-istânda kadeh-nûş oldular
• Nâr-ı dilden zâhir etsem bir şerer âlem yanar
• Yürü hey âşıkına âdeti bî-dâd yürü
• Dimen Mecnûn'a fenn-i aşkı tekmîl itdi kâmildür
• Kayddan âzâdeyiz kûy-ı ferâgat bekleriz
• Sararmış çehremi sanman ki reng-i za'ferândır bu
• Nigârâ bezm-i hüsnünde dil-i mestânemiz kaldı
• Sen yüzü gülsün cihân gülzârı zindândır bana
• Şi'r ü saz ü dilber ü mey kim cihânın cânıdır
• Zati'nin Gazeline Tahmis
• MUAŞŞER
• Ol gınâ şâhı ki doydu bende olan ac aña
• Ol melek-sîmâ perî kim benzemez insân aña
• Zevk-i bâde neydigin mest-i harâbîler bilür
• Bu kat kat kan ile dolmuş dili cânâna tapşurdum
• Ŝādıķu’l- ķavl olsa dilber bī-vefā yār olmasa
• Çözdükce çın seher o ŝanem zülf-i bāġını
• Ża‘f-ı cismümden ķaçan kim eylesem bir dem fiġān
• Murabba Der Katl-i İbrâhîm Paşa