1.Her nefes bin kasd-ı cân itmek dilersin itmegil
Bu cefâyı her zamân itmek dilersin itmegil
2.Bildük ol hûnî gözün kim cânumuz kasdındadur
N’ola nâ-hak yirde kan itmek dilersin itmegil
3.ʽÂşıkı hicrân içinde zârî kıldun kılmagıl
Müdde‘îyi şâdumân itmek dilersin itmegil
4.Hüsnünün bâgı gülin her bir hasûda arz idüp
Nev bahârumı hazân itmek dilersin itmegil
5.Bülbül-i bâg-ı İremsin sahn-ı cennetdür yirün
Her budakda âşiyân itmek dilersin itmegil
6.Vasluna bin cân virürsem kıymeti olmaz henüz
Sen hod anı râyigân itmek dilersin itmegil
7.Dâiyâ vaslı hayâlin dutmagıl fıkründe sen
Bu tasavvurdan ziyân itmek dilersin itmegil
Kemal YAVUZ, TÜRK EDEBİYATINDA ŞİİR VE İLK ŞİİR MECLİSLERİ, https://www.journals.istanbul.edu.tr/iuturkiyat/article/viewFile