Ķaśįde-yi Fużūlį DernaǾt-ı Ĥażret-i Seyyidü’l-Mürselįn
Ķaśįde-yi Fużūlį DernaǾt-ı Ĥażret-i Seyyidü’l-Mürselįn Śallallāhu TeǾāla ǾAleyhi
ve Sellem
FāǾilātün / FāǾilātün / FāǾilātün / FāǾilün
1. Āb levĥi üzre çekmiş mevcden mısŧār śabā
Sebzeden naķl itmege vaśf-ı ĥaŧ-ı dilber śabā
2. Almaġ içün ķıymetile sebzeden şebnem dürin
Yāseminden sebze dökmüş yā semįnden zer śabā
3. Aġzuñ esrārın diler fāş ide açup ġoncadan
Gör ne rengile ķılur ižhār-ı her mużmer śabā
4. Encümenler seyr idüp nesrįn beyāżın gezdirür
Ĥüsn ü ħulķuñda dürüst itmek [diler] maĥżer śabā
[63b] 5. İnfiǾāl itmiş meger sürǾatde raħşuñdan senüñ
Kim gezer maħfį görünmez kimseye micher śabā
6. Aħdarup bulmaġ diler vaśf-ı ruħuñ kim muttaśıl
Nüsħa-yı gül-berg evrāķın ķılur ezber śabā
7. Āb-gūn tįġuñca olmaz bunca dāįm kim virür
Tįġ-i āb-ı cūy-bāre mevcden cevher śabā
8. Āyaġuñ ŧopraġını yerden alur taǾžim ile
Ġalibā düzmek diler başına bir efser śabā
9. İşidüpdür ġālibā ķaddüñle şemǾüñ baĥŝini
Her ķaçan gördüyse eyler şemǾe ķaśd-ı ser śabā
10. Āstānuñda muķįm olmaġa bulsaydı ķabūl
Ĥaķ bilür olmazdı ser-gerdān-ı baĥr u ber śabā
11. Āsmāna ķadr ile çıķsa ne ĥāśıl çün degül
Aña ķābil kim ola ķapuñda ħāk-ı der śabā
12. Āteş-i bįdāde köymüşdür olupdur dād-ħˇāh
Gördigi yerde śaçup başına ħākister śabā
13. Āb-ı deryā üzre geh İlyāsveş seyrān ider
Gāh eyler hem-şiken İbrāhimteg āźer śabā
14. Oddan āfet görmez ü śudan żarar gūyā ķılur
Ķande olsa iķtidā-yı ey şerǾ-i Peyġamber śabā
15. Aĥmed-i Mürsel ki fermānber Süleymāndur aña
Eyle kim gördi Süleymān oldı ferbānber śabā
16. Ol şehinşeh kim rıżāsıyla gezer her ķande var
Ger şimāl ü ger cenūb u ger debūr u ger śabā
17. Ey gül-i bāġ-ı rusül bir tāze gülşendür ķapuñ
Kim dem-i Cibrįle ol gülşende ŧaǾn eyler śabā
18. İsteyüp bulmaz ķapuñ feyż anuñiçün muttaśıl
Ķanġı gülşen seyrine girse çıķar mużŧer śabā
19. İledür ħāk-i derüñi źerre źerre gülşene
Ķılmaķ içün tūtiyā-yı dįde-yi ahber śabā
20. Olduġuyçün rūz tek pinhān girüp gülşenlere
Bįsebep raħt-ı gül ü nesrįne ġāret-ger śabā
21. Āteş-i bįdād ile Ǿālem yanar ger ķılmasa
ǾAdlüñi şāyiǾ gezüp her dem yedi kişver śabā
22. Öz günāhına şefāǾat isteyüp feryād idüp
Çizginür ħāk-ı mezāruñ üzre tā maĥşer śabā
23. İtmezem terk-i temennā-yı ŧavāfuñ çıķsa cān
Ħāk hem olsam ġubārımı saña ilter śaba
24. Açmış ümmįd-i dem-i vaśluñ dil-i pür-ħūnımı
Öyle kim faśl-ı bahār açar gül-i aĥmer śabā
25. Öyle inceldim żaǾįf oldum ki ħāk-ı kūyuña
Ķābilim ħāşāk tek olsa baña rehber śabā
26. İltimāsım baħttan oldur ki cārı ĥükmüñe
Ŧār yā ĥįne çemen mülkinedür server śabā
27. Ola naǾtuñdan Fużūlįnüñ kelāmı dil-pezir
Eyle kim gülden bulur enfās-ı cān-perver-śabā
Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012
