Ķaśįde-yi Nā'ilį Derna't-ı Hażret-i Muĥammedü’l-Arabį
Ķaśįde-yi Nā'ilį Derna't-ı Hażret-i Muĥammedü’l-Arabį Śallallāhu Te'ālā Aleyhi ve Sellem
MefāǾilün / FeǾilātün / MefāǾilün / FeǾilün
1. Ne şād-māni-yi bezm-i viśāl-i yār ķalur
Ne źevķ-i śoĥbet-i sāķi-yi gül-Ǿizār ķalur
2. Ħum-ı felek gibi bir gün olur bu kūçe tehį
Ne pįr-i bāde-turūş u ne bāde-ħˇār ķalur
3. Miŝāl-i muġbeçe vü pįr-i mey bu meclisde
Zamān olur ne cevān u ne iħtiyār ķalur
4. Bozar şarābını seyl-i fenā bu maśŧabanuñ
Ne reng-i neşve ne ālāyiş-i ħumār ķalur
5. Śafā gider keder-ālūd olur bu meclis-i üns
Ne cürǾasında ne śāfında keyf ü kār ķalur
6. Fenā bulur neşǿet-i Ǿadem-i peźįr-i vücūd
Ne mest ü bāde ne maħmūr u hūşyār ķalur
7. Bu sūrgāh-ı fenāya gelür o deñlü kesel
Ki sāz-ı Zührede bir gün gusiste tār ķalur
8. Olur muśayķal-ı ħākister-i fenā bir gün
Ne reng-i āyine-yi dil ne inkisār ķalur
9. Ķonan göçer bu sarāy-ı sipenc-i fāniden
Bu tāb-ħāne de bir gün ħarābe zār ķalur
10. MetāǾ-ı devlete aldanma kim bu kişverde
Hezār ħˇāce ġarįbü’d-diyār u dār ķalur
11. Olursa her biri śāĥib-defįne-yi Ķārūn
Yine metāǾ-ı bu maħzende müsteǾār ķalur
12. Ne deñlü raġbete şāyān olur metāǾ-ı emel
Bu kārgāh-ı ħarāba ne iǾtibār ķalur
13. Ki niçe ķāfile sālār-ı kārbān-ı vücūd
Bu teng-nāy-ı fenāda şikeste-bār ķalur
14. Ĥarįf-i meslek-i Ferhāda müzd-i tįşe yeter
Bu kūhsārda ancaķ ħırāş-ı kār ķalur
15. Olur vücūd-ı Ǿanāśįr fenā peźįr-i Ǿadem
Ne ferǾ-i çār-ı tabįǾat ne aśl-ı çār ķalur
16. Virür esās-ı pul-ı çarħa bād-ı fitne şikest
Bu cilvegehde ne menzil ne iǾtibār ķalur
17. Bu gülsitānede bir gün eser semūm-ı Ǿadem
Gider bu neşv ü nemālar ne gül ne ħār ķalur
18. Ne bād-ı śarśar-ı āh u cüzǿ-i ħāk-i beden
Ne sūz-ı dil ne nem-i çeşm-i eşk-bār ķalur
19. Ne reng-i lāle-sitān-ı ciger ne bāġ-ı vücūd
Ne berg-i baġ-ı dil ü sįne-figār ķalur
[85a] 20. Bu ĥāle aġla gel ey dįde kim keŝāfet-i ġam
Sen olmasan ten-i ħākįde pāydār ķalur
21. Gel ey enįs-i dil ey ġam ki ĥasretüñ tende
Medār-ı ħaşyet-i endūh ħārħār ķalur
22. Fenāsına o demüñ aġla kim zebānımda
Ŝenā-yı Aĥmed-i Muħtāra iķtidār ķalur
23. ŞefįǾ-i rūz-ı ķıyāmet Muĥammed-i ǾArabį
Ki ĥaşr-ı luŧfı ile bįgünāhkār ķalur
24. O mihribān-ı ümem ol şefįǾ-i rūz-ı nedem
Ki nehyi gūş-ı meǾāśide gūşvār ķalur
25. O çeşme-sār-ı mürǿüvvet ki şāh-rāhında
Hezār Ħıżr u Sikender ümįdvār ķalur
26. Kitāb-ı nüsħa-yı Ǿilm-i ledün ki fehm-i ħıred
Ķuśūr-ı şerĥ ü beyānında şermsār ķalur
27. Zihį kitāb ki maǾnā-yı noķŧasında bile
Hezār nükte-yi pinhān u āşkār ķalur
28. Kef-i kerįmini yād itse ebr eger śad sāl
Miŝāl-i ķaŧre zemįne güher-niŝār ķalur
29. Bunuñla sāĥa-yı pehnā-yı cūdın eyle ķıyās
Ki çarħ o sāĥada mevhūme bir ġubār ķalur
30. Kerem ki dāmen-i iķbāline teşebbüŝ ider
Sitem ki śad meh-i ķahrile ħāksār ķalur
31. Firāz-ı bām-ı sipihre o sāye-güster olur
Ĥażįż-i ħāk-ı meźelletde bu nizār ķalur
32. Eyā şefįǾ-i güneh pįş-gān-ı rūz-ı cezā
Ki cürm merĥametüñle źelįl ü ħˇār ķalur
33. ŞefāǾatüñle olanlar Ǿamel-ŧırāz-ı ķabūl
Bu kār-ħāne-yi fıŧratda sāzkār ķalur
34. Ķarįn ola şeref-i ħidmetüñle mihr-āsā
Bu çār-tāķ-ı zebercedde tācdār ķalur
35. Ġınā-yı cūduñ ile źimmet-i ħalāyıķda
Ne izz-i devlet ü ne źüll-i iftiķār ķalur
36. Ümįdvāri-yi iksįr-i iltifātuñ ile
Vücūd-ı ħāki-yi ümmet ki ħˇār u zār ķalur
37. Türāb iken bir avuc sikke ķabūlüñ ile
Revāc-baħş-ı zer-i kāmilü’l-Ǿayār ķalur
38. O rāyeti-yi keremsin ki tāb-ı germādan
Žılāl-ı ķurbuña anlar ki ħˇāst-kār ķalur
39. Verāy-ı perde-yi nūrında mihr-i rusta-ħįz
Ħacālet-i Ǿalemüñle niķābdār ķalur
40. O dem ki müstenidān-ı Ǿamel o bādiyede
Fütāde-yi leked-i Ǿucb u iǾtibār ķalur
41. O dem ki ħaŧve-yi evvelde bįm-i laġzişden
Reh-i śırāŧda ol fırķa ehl-i nār ķalur
42. O dem ki merkez-i ĥayretde ol belā-keşler
Miŝāl-i noķŧa-yı mevhūme bįķarār ķalur
43. O dem ki pįş-i İlāhįde ol siyeh diller
Hezār töhmet ile dūzaħı şiǾār ķalur
[85b] 44. O dem ki defter-i aǾmāl-i seyyiǿāt-ı ümem
Birūn-ı dāǿire-yi noķŧa-yı şumār ķalur
45. O dem ki dest-i şefāǾatde ol ġarįblerüñ
Sevād-nāmesi mevķūf-ı iǾtizār ķalur
46. Niśāb-ı naǾtuñile Nāǿilįnüñ oldur ümįd
Ki cürmi maġfiret-i Ħālıķa medār ķalur
47. Sen ol Ĥabįb-i Ħudāsın ki rūz-ı maĥşere dek
Ŝenāsı mūcib-i ġufrān-ı Kirdgār ķalur
48. Sen ol muķarreb-i dergāhsın ki pāye-yi Ǿarş
ǾUluvv-ı şān-ı şerįfüñle üstüvār ķalur
Ser melāǿikede tāc-ı iftiħār ķalur
50. Sen ol şeref-reh-i miǾrācsuñ ki maķdemüñe
Ĥarįm-i Ǿarş-ı İlāhį ümįdvār ķalur
51. İdüp Burāķuñı ol demde Refrefe teslįm
Emįn-i vaĥy o berįd-i śabā-güźār ķalur
52. Ferişte-gān-ı muķaddes o şevķ ile nāgāh
Yolunda secde-ber-i rāh-ı intizār ķalur
53. Muĥassenātıña ĥadd olmayınca ŧabǾ-ı ķabūl
Süħan-güźāri-yi naǾtuñla şerm-sār ķalur
54. Geçerse vaśf-ı cemįlüñle rūzgārı yine
Zebān-ı nāŧıķa ħaclet-güzįn-i kār ķalur
55. Ola o ġāyete dek rūĥuña durūd u selām
Ki şūr-ı zelzeleden ĥaşr pür-ġubār ķalur
56. Bu tāc u taħtı ķoyup ħusrevān-ı dehr ancaķ
Žahir-i mülk-i Ħudāvend gįrūdār ķalur
Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012
