Ķaśįde-yi Nā'ilį Derna't-ı Ĥażret-i Nebiyy-i Muĥterem Aleyhi’s-Selām
Ķaśįde-yi Nā'ilį Derna't-ı Ĥażret-i Nebiyy-i Muĥterem Aleyhi’s-Selām
FeǾilātün / MefāǾilün / FeǾilün
1. Çįn-i nāzım cebįn-güşā-yı dilim
Fitneyim genc-i iħtifā-yı dilim
2. Baĥr-i mevvāc-ı āteşįn-girdāb
Dāġ-ı tedbįr-i nāĦudā-yı dilim
3. Germ-i sįmāb-ı mużŧarib ĥālim
Cünbüş-i ġamzeyim belā-yı dilim
4. Cilvegāh-ı nigāh-ı ħūbānım
Maĥşer-i fitneyim feżā-yı dilim
5. Çāşnį-senc-i tįġ-i bįdādım
Dāġ-ı her-pāre-yi cüdā-yı dilim
6. Olsam ālūde gerd-i rāh-ı heves
Dāmen-i perde-yi ħafā-yı dilim
7. Ĥüsn ile ġamze āşinā göreli
Düşmen-i tįġ-i derķafā-yı dilim
8. Zāyir-i sūmenāt-ı Ǿışķ olalı
Reşk-i fermā-yı pārsā-yı dilim
9. Levĥ-i bįreng-i Ǿālem-i maǾnį
Śūret-i naķş-ı māsivā-yı dilim
[87b] 10. Śūret-ārā-yı naķş-ı ĥüsn olalı
Büt-i tırāş-ı kilįsyā-yı dilim
11. Āfet olsam ħayāl-i yāre n’ola
Maĥrem-i çeşm-i āşinā-yı dilim
12. Levĥeşallah ħayāl-i būķalemūn
Ki hevās ile ġam-zedā-yı dilim
13. Farŧ-ı nežžāre-yi telāşįden
Ħįre-çeşm-i śanem-serāy-ı dilim
14. Cān virelden o ŧıfl-ı nev-hevese
Şermsār-ı sülūk u rāy-ı dilim
15. İdeli ķıblegāhın ebru-yı yār
Pāy ber-cāy-ı iķtidā-yı dilim
16. Yād ķıldıķça dāmen-i zülfün
ŞuǾle-yi dāġ-ı ibtilā-yı dilim
17. ŞuǾle-yi ħançer-i nigāhından
Teşne-leb ħūn-ı Kerbelā-yı dilim
18. Dāħil olsam ĥarįm-i vuślatına
Ser-bepįş ü nažar bepāy-ı dilim
19. Bįm-i renc-i ħumār-ı hecrinden
Mest-i zehrābe-yi cefā-yı dilim
20. Ben ki murġ-ı ķafes-nişįn-āsā
Nev-giriftār-ı tengnā-yı dilim
21. Şevķ-i āyįne-yi cemālinden
Ŧūŧi-yi şekkerįn-edā-yı dilim
22. İķtibās-ı fürūġ-ı ĥüsnünden
Nūr-ı pįşāni-yi ŝenā-yı dilim
23. YaǾni vaśśāf-ı faħr-ı kevneynim
Maĥrem-i rāz-ı müddeǾā-yı dilim
24. NaǾt-gūy-ı Ĥabįb-i Mevlāyım
Ĥırz-ı bāzū-yı iǾtinā-yı dilim
25. Faħr-ı Ǿālem Muĥammed-i ǾArabį
Ki derinde muķįm-i cāy-ı dilim
26. Bārgāh-ı ĥarįm-i Ǿizzetinüñ
İntisābıyla müttekā-yı dilim
27. Olalı bezm-i luŧfına sāķi
Mest-i peymāne-yi vefā-yı dilim
28. İdeli kim niśāb-ı midĥatine
Dest-i deryūze-yi Ǿaŧā-yı dilim
29. Bulalı pāye-yi ġulām-ı derin
Şehriyār-ı cihān-serāy-ı dilim
30. ǾAcz-i evśāf-ı muǾcizātı ile
İǾtirāf-āver-i ħaŧā-yı dilim
31. Pįş-i evśāf-ı ħāndānında
Tutuķ-ı çehre-yi ĥayā-yı dilim
32. Ben ki yād eyledikçe miǾrācın
Lāmekān seyr-i māverā-yı dilim
33. Bām-ı Ǿarşa Ǿuluvv-i şānından
Bįmuĥābā nihāde pāy-ı dilim
34. Ŧayy-ı žulmet-serāy-ı Ǿālem içün
Ol zamānlar ki reh-nümā-yı dilim
[88a] 35. Kem şerār-ı fürūġ-ı nūrından
MeşǾal-efrūz-ı pįşvā-yı dilim
36. Ĥabbezā vaśf-ı pāye-yi miǾrāc
Ki edāsıyla ħāk-ı pāy-ı dilim
37. Merĥabā cilvegāh-ı nāz u niyāz
Ki ĥarįminde çehre-sāy-ı dilim
38. Pādşāhā ķapuñda besdür bes
Bįedep tābiǾ-i hevā-yı dilim
39. Ber-fużūlüm hemįşe bįtaķrįb
Ķaśd-ı pervāz-ı mācerā-yı dilim
40. Mücrimim Ǿāśiyim günehkārım
Lāyıķ-ı renciş-i cezā-yı dilim
41. MaǾśiyet kāh-ı kemterįn ise ben
Ķuvvet-i ceźb-i kehrübā-yı dilim
42. Ķurb-ı Ǿısyān u baǾd-ı ġufrānuñ
Yād ķıldıķça hem nevā-yı dilim
43. Mātem-efrūz-ı şād mürg-i ecel
Cūşiş-i girye-yi ġazā-yı dilim
44. Nāǿilįyim ki ferş-i pāyuñ içün
Ħˇāce-yi kāle-yi duǾā-yı dilim
45. Nitekim cilvegāh-ı vaśfında
Rāyiż-i ħınk-ı bād-pāy-ı dilim
46. Ĥaşre dek dāmen-i şefāǾatüñe
Dest-i küstāħi-yi recā-yı dilim
Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012
