Ķasįde-yi Nā'ilį Derna't-ı Ĥażret-i Risālet-Penāh Śallallāhu Aleyhi ve Sellem
Ķasįde-yi Nā'ilį Derna't-ı Ĥażret-i Risālet-Penāh Śallallāhu Aleyhi ve Sellem
MefāǾilün / FeǾilātün / MefāǾilün / FeǾilün
1. Kerem taśavvur ider çarħ-ı dūn Ǿitābında
Ki ĥaml-ı minnet ider cevr-i bįĥisābında
2. Zihį mükābere kim efđal-i Ǿibādetdür
Eźiyyet-i Ǿurefā mezheb ü źehābında
3. O zümrenüñ biri de Nāǿilį-yi bįkesdür
Ki rūy-ı dil göremez baħt-ı pür-Ǿitābında
4. O cemǾüñ aĥķar u nāçįzidür ki peydādur
Kemāl-i feyż-i dil ü ŧabǾ-ı müsteŧābında
5. Cenāb-ı ħālıķa minnet ki olmamış hergiz
Sipihr-i bed-güherüñ fikr-i nān u ābında
6. İżāǾat ittügi evķāt-ı penç ü penceh-sāl
Ki Ǿömrüñ oldı hebā ġaflet ü şebābında
7. Tefaķķud itmedi bir nāķid-i güher ki bula
Hezār genc-i meǾāni dil-i ħarābında
8. Süħanla olmış iken bezm-i Ǿālemüñ rūşen
Çerāġ-ı mihr gibi zįr-i nüh-i ķıbābında
9. Sözünden eyler iken iktisāb-ı Ǿizz ü şeref
Yazılsa levĥ-i zer-endūd-ı āftābında
[86a] 10. Bu ħānedān-ı saǾādet-ķarįnüñ olmış iken
Sütūde-medĥ-i selāŧįn-i kām-yābında
11. Ŧılısm-ı devlet ü vefķ-i saǾādet olmış iken
Ķaśāǿidi niçe düstūr-ı Cem-cenābında
12. Diler ki ĥįle ile naķd-i nāmın eyleye kim
Diyār-ı Edrinenüñ bir avuç türābında
13. Dirįġ böyle geçen Ǿömre kim żarūret ola
Bu tāb-ħānenüñ ārām-ı ħord u ħˇābında
14. Ne deñlü cünbüş olur raħş-ı tünd-i iķbālüñ
Bir iki gün ĥaşer-i pāy-derrikābında
15. Kim aġlar idi ħarābāt-ı dehrüñ ehl-i meźāķ
Bulaydı ħūn-ı ciger ĥāletin şarābında
16. Kim istemezdi bu meclisde Ǿıyş u nūşu eger
Olaydı neşve meyinde nemek kebābında
17. Bu bāġda niçe mümkindir istiǾāre-yi şevķ
Tefāvüt olmayıcaķ bülbül ü ġurābında
18. Belā budur ki yine ehl-i cāhı mest-i ġurūr
Buħār-ı bāde-yi naħvetle cāme-ħˇābında
19. Ķuŧās-ı şevket ü zįbi ħazān-ı mezbele-keş
Ķumāş-ı devleti cüll-i ester ü kilābında
20. Vücūdı cįfesin eyler nažįf-i zuǾmunca
Sarāy-ı nekbetünüñ ĥavż-ı müncilābında
21. Caĥįm-i Ǿāciz-i taŧhįri olduġın bilmez
O cįfenüñ müteneffir olup Ǿazābında
22. Ne deñlü emr-i maǾāşında cüst ü çāpük ise
O deñlü kāhil olur āħiret ĥisābında
23. Yine netįcesi maĥşerde rū-siyāhįdür
Olursa defterinüñ ķayd-ı iĥtisābında
24. Fenā-yı Ǿāleme ey bü’l-heves şuǾūruñ yoķ
Bu āh u girye nedür çarħuñ inķılābında
25. Dimāġuñ eyle muħattal bu sevķ-i ĥırmānuñ
Ümįd-i laħlaħa-yı Ǿūd u müşk-i nābında
26. Vücūduñ itme mülevveŝ zamānuñ olma şerįk
Hemįşe ŝavb-i tefāħürle āb u tābında
27. Libāsdan ġaraż ey ħˇāce setr-i Ǿavret ise
Nedir taǾalluķuñ ārāyiş-i ŝiyābında
28. NeǾūźibi’l-lāh ey dil bu güft ü gūlardan
Ki nāgeh olmayasın münfaǾil cevābında
29. Ķo ĥāl-i ġayrı sen ey bįĥicāb kendüñi gör
Ne oldı māĥaśıluñ çarħ āsiyābında
30. Ĥazer ġurūrdan ey müşt-i ħāk fikr eyle
Meǿāl-i ĥāl-i enāniyyet iktisābında
31. Bu zaħma merhem-i şāfi gerek ki cān u ciger
Hevānuñ olmaya tefsįde iltihābında
32. Bu sūz u tābı gidermez meger o bādiye kim
Ġarįķ-i raĥmet olur teşneler serābında
33. Zihį feżā-yı muķaddes ki iǾtidāl-i bihişt
Nuhuftedür eŝer-i feyż-i sūz u tābında
34. Olur şitāba muraħħaś semūm-ı ħurdeleri
Şarāb-ı kevŝer ü tesnįm śāf u tābında
O yolda māle kim eyler nažar ki ħāsirdür
Niŝār-ı naķd-i ĥayāt etmeyen ĥisābında
36. O rāhı ŧayy idüp ey kilk-i ħoş-nevā gel gel
Terāne-senc olalım naǾt-ı müsteŧābında
37. Ki mündericdir o sulŧān-ı cümle-yi rusülüñ
SaǾādet-i ebedi midĥat-i cenābında
38. Gül-i ĥadįķa-yı cān u cihān ki peydādur
Şemįm-i Ǿāŧıfet-i źü’l-minen gülābında
39. Bihişt taǾbiyedür gülşen-i şefāǾatinüñ
Miŝāl-i nefĥa-yı gül feyż-i intisābında
40. Şeh-i melāǿikeǾasker Muĥammed-i ǾArabį
Ki enbiyāya şeref meşy idi rikābında
41. Fürūġın eyler idi āftāb sāye eger
Olaydı sāye ten-i āftāb-tābında
42. Ħat-ı muśannif idi nüsħa-yı vücūdı tamām
Ne iĥtimāl idi ħarf-ı ħaŧā kitābında
43. Girifte-māh idi ol mihr-i biǾŝetüñ ħūrşįd
Ġaŧā-yı şerm [ü] pes-i perde-yi ĥicābında
44. Zihį eŝer ki rehįndür saǾādet-i įmān
Münāfıķına bile refķ ile ħiŧābında
45. Olunca seyf ile mebǾūŝ o server-i levlāk
Girifte-reng idi şimşįr-i kįn-i ķırābında
46. Çihāryārı ki bezl itdi cān-ı şįrįnin
Olup şehādetüñ ümmįd-i şehd-i nābında
47. Muħallifān-ı Ķureyşe oķutdı her birisi
Cihādı emrini tįġ-i siyāh-tābında
48. Ħaŧā-yı maĥż idügin ķįl ü ķāl bildi Ǿadū
Merātib-i ħulefā-yı şeref-meǿābında
49. İrince Sidreye Cibrįl idi o sulŧānuñ
Revende pįş-i Burāķ-ı ķamer rikābında
50. Zihį tekāver-i endįşe-rev ki Ǿāciz idi
Berįd-i cüst-i nažar sürǾat ü şitābında
51. Zihį Burāķ ki mihr oldı žıll-ı Ǿarża şebįh
Nişįb-i naǾl-i süm-i pür-fürūġ u tābında
52. Baśınca farķ-ı sipihre ķadem ŧutuldı tamām
Ķamer muǾaķķarına çetr-i zer ŧınābında
53. ǾUrūcı āh-ı yetįm ü duǾā-yı śubĥa delįl
Hubūŧı yoķ felegüñ berķ ile şehābında
54. Fürūġ-ı mihr ü mehe nāz iderdi bulsa felek
Cevāhir-i Ǿaraķın dāmen-i seĥābında
55. İderdi kesb-i şeref bāzgūne olmasa ger
Felek teşābüh-i saŧl u şafaķ-ħiżābında
56. Virürdi seyle çerāġāhın iştiyāķ-ı Ĥabįb
Degildi fikri bihiştüñ giyāh u ābında
57. Gözine girmez idi ħˇāb girse de gāhi
Cemāl-i enver-i pākin görürdi ħˇābında
58. Berįd-i aķdese bir özge ĥālet el virdi
O dābbenüñ eŝer-i Ǿışķ-ı sūz u tābında
[87a] 59. Hezār gūne nevāzişle eyledi daǾvet
Ķudūm-ı ĥażreti tebşįr idüp ħiŧābında
60. Şikāl-i śabrını nām-ı Muĥammed itdi şikest
Tezelzül-āver-i ħuld oldı ıżŧırābında
61. Cinānda olmasa ger şād-merg olurdı hemān
Sürūr-ı daǾvet-i bį-şekk ü irtiyābında
62. Zihį burāķ-ı peyamber-süvār [u] ħuld-sıŧabl
Ki ser-ŧavįle idi cümle-yi devābında
63. Zihį śiyānet-i ümmet ki oldı gāh-ı Ǿurūc
Żamān-ı Ǿafv-ı Ħudā şiddet-i Ǿiķābında
64. Burāķ u Refref ü Cibrįl ķaldılar ĥayrān
O nūr-ı pāk-ı ħıred-sūzuñ incizābında
65. Felekler oldı o şām içre Ǿanberįn yedi ŧop
Ki reşkidür Ħotenüñ dāġ-ı müşk-i nābında
66. İrişdi göz yumup açınca ķabe ķavseyne
Nesįm-i śubĥ ile gül-berg idi şitābında
67. Açıldı bāb-ı żiyāfet-serāy-ı ġaybü’l-ġayb
Ki pā-şikestedür idrāk-ı derki bābında
68. Verā-yı perdededür cilvegāh-ı güft ü şenįd
Budur netice mucįb ü eger mücābında
69. Olunsa ķıśśa-yı miǾrāc-ı ĥaşre dek taķrįr
Güneşde źerresidir ķaŧredür seĥabında
70. Muĥįŧ olan yine sensin bu rāzı söz mi deger
Gedāya nezd-i şeh-i mālikü’r-riķābında
71. İlāhi eyleme şermende Nāǿili ķuluñı
DuǾā-yı bį-eŝer ü ġayra müstecābında
72. Bula saǾādet-i iksįr-i Ǿizz-i dāreyni
Ĥarįm-i merķad-ı pür-nūrunun türābında
Mustafa Atila, NU’ÛT-I NEBEVİYYE MECMÛASI, Dicle Üniversitesi Sosyal Bilimler Enstitüsü ,Yüksek Lisans Tezi Diyarbakır 2012
