Kerem Redifli Kaside

Kaside

Hurrem irdi bu kerâmetlü gün iy kân-ı kerem
Iyş u zevk it ki fedâdur yoluna cân-ı kerem
Kutlu dem bahtlu sâ’atdür ü ferhûnde zamân
Ki yine kullara teşrîf idiser hân-ı kerem
3. Câm-ı zer tutduğı ıyd ayı gibi devr-i felek
Ya’ni kim mevsim-i işretdür ü devrân-ı kerem
Kerem ehlin bu gice seyr cihânında görüp
Soraram bunlara kim n’oldı sehâ kanı kerem
Didiler gel berü tâlib-i iksîr-i hayât
Gözle şol işiği kim toprağıdur kân-ı kerem
6. Dergeh-i şâh-ı atâ-pîşe vü hayr-endîşe
Germiyân memleketi mâliki sultân-ı kerem
Açılur ni’meti yağmurı-y-ıla gülşen-i cûd
Bezenür kâmet-i servi-y-ile bûstân-ı kerem
Pâsbân saltanatı kasrına keyvân-ı felek
Sâyebân devleti dergâhına eyvân-ı kerem
9. Keremi ehline kısmet idicek Rabb-i kerîm
Gör kerâmet ki kirâm içre sever anı kerem
İy ki fazlun güheri mâye-i ummân-ı atâ
V’iy ki feyzün eseri dâne-i nîsân-ı kerem
Şeref-i zâtun-ıla fahr ider evkât-ı şerîf
Kerem ü lutfun-ıla hoş geçer âvân-ı kerem
12. Keffesinde dü cihân ni’metini az görür
Himmetin çünkü eline ala mîzân-ı kerem
Ne aceb ger yüz ura Hızr u Sikender kapuna
K’işiğinden akar uş çeşme-i hayvân-ı kerem
 
Gerçi Fir’avn ola düşmenleri kahritmek için
Yed-i beyzâdur elün hüccet ü bürhân-ı kerem
15. Ne aceb ger Karaman bulmasa âlemde emân
Çünkü yâr itdi sana devlet-i Osmân-ı Kerem
Boşalur kâse-i bahr u tükenür kîse-i kân
Bulımaz ni’met-i bî-haddüni pâyân-ı kerem
Çok işiğe yüz urur ille ki mahrûm döner
Yine kapunda bulur hürmeti mihmân-ı kerem
18. Lutf çevgânı-y-ıla tapun urısardur tôp
Çünkü merdân-ı mürüvvet tuta meydân-ı kerem
Şükr kıl fakrun-ıla itme şikâyet Şeyhî
Derdüne şâh-ı kerîm eyleye dermân-ı kerem
Eller içre ne kadar k’anıla insâf u sehâ
Diller içre nice kim şen ola destân-ı kerem
21. Başlana adun ile nâme-i dîbâce-i cûd
Yazıla vasfun ile defter ü dîvân-ı kerem
Dâyim ola tapuna ıyd-ı safâ vakt-ı sa’id
İşiğinden virile âb-ı sehâ nân-ı kerem
 
İsen, Mustafa – Kurnaz, Cemal (1990), Şeyhî Divan, Ankara: Akçağ Yayınları. 

( Not : Bu kasideye, Ahmet Paşa 'da dahil bir çok nazire yazılmıştır.) 

 Şeyhi Hayatı Edebi Kişiliği Eserleri

Şeyhi Hüsrev-i Şirin Mesnevisi

Şeyhi Harname Özeti Harnameden Bölümler

Şeyhi Divanı

Şeyhi Şiirlerinden Seçmeler