Na’t-ı Nebî ‘Aleyhisselâm

Na’t-ı Nebî ‘Aleyhisselâm

 [Fâ’ilâtün Fâ’ilâtün Fâ’ilâtün Fâ’ilün]

− · − − / − · − − / − · − −/ − · −

1 İy habîb-i Hakk-ı güzîn halk-ı fahr-ı enbiyâ

 Server-i dîn ü şerî’at pây-ı râh-ı Hüdâ

 Halk-ı ‘âlem içre sensin serverâ Mahmûd olan

 Enbiyâ vü mürselîn içinde sensin Murtazâ

 Zât-ı ferhunde sıfâtuñ birle fahr eyler senüñ

Enbiyâ vü evliyâ vü asfiyâ vü etkiyâ

 Sensin olan seyyidü’l-kevneyn [u] fahrü’l-’âlemeyn

 Sensin olan rahmeten lil-’âlemîn öñden soña

5 Sensin olan kenz-i mahfî zâhir olmaga sebeb

 ‘Âleme zât-ı şerîfüñdür senüñ hikmet-nümâ

 Sensin ol mahbûb-ı Hakk kim ‘aşkuña oldı senüñ

26

 Cümle mahlûkât-ile bu görinen arz u semâ

 Sevmiş-idi sen habîbi Hazret-i Rabb-ı vedûd

 Yogıken dâmı yeri ile dahı bu tîn ü mâ

 Fıtrat u hilkat deminden hil’at-i Levlâkle

 Tapuñı kılmışdurur teşrîf-i zât-ı kibriyâ

 Devr-i âdemden berü niçe nebî geldi velî

 Sen kadar kadr anlaruñ bulmadı biri serverâ

10 Ümmetüñ gibi senüñ anlar dahı hep cümleten

 Rûz-ı mahşerde şefâ’at senden eylerler recâ

 Havfdan nefsî vü nefsî diye anlar her biri

 Diyesin ol günde sen vâ ümmetâ vâ ümmetâ

 Sidreye hem-tâ livâñ altında olanlar o gün

 Her biri âsûde hâl olub diye Tûbâ lenâ

 Bakmadukda ümm ü eb evlâda kardaş kardaşa

 Devlet anuñ diyesin ol gün aña sen merhabâ

 Bu fezâyil sende olmasın mı lutfundan seni

 Eşref-i mahlûk idüp mahbûb edinmişdür Hudâ

15 Mâhasal yüz dikkat-ile biñde biri fazlıñuñ

Şerh olunsa haşre dek hergiz olunmaya edâ

 Lutf-ı bî-hadd-ıla medh iden seni Mevlâ iken

Şânuña lâyık seni kimdür ki medh ide şehâ

Şânuña lâyık müyesser midurur medh eylemek

 Anı kim medh eyleyen lutfundan ol Mevlâ ola

 Zî-sa’âdet anlara kim sıdk-ıla ihlâs-ıla

 Eylediler inkiyâd idüb tapuña iktidâ

 Dahı cümle âlüñe ashâbuña ikrâm idüb

 Oldılar her birine anuñ muhibb-i bî-riyâ

20 Anlaruñla buldı istihkâm-ı evvel çünki dîn

 Anlara pes kankı bî-dîn ola münker evvelâ

 Anlaruñ kavlin tutan bulur hidâyet şübhesüz

 Anlaruñ yolın varan bulur dalâletden rehâ

 Cümleden akdem husûsâ çâr-rükn-i beyt-i dîn

27

 Ya’nî kim yâr-ı güzîn ol çâr-yâr-ı bâ-safâ

 Evvelâ ol yâr-ı gâr olan Ebû Bekr-i takı

 Ki;ola idi ashâb-ı dîne evvel olan pîşvâ

 Hem ‘Ömer kim aña virmişdi Hudâ insâf u ‘adl

 Râh-ı dîn içre kemâl-i ‘adl-ıla insâf aña

25 Hem dahı ol câmi’-i Kur’ân olan ‘Osmân ki_anuñ

 Lutf-ıla şânında hatm olmışdurur hilm ü hayâ

 Kimdurur iden ‘Alî-yi Murtazânuñ medhini

 Kim aña mahsûsdur ‘âlemde sırr-ı lâ-fetâ

 Hem Hasan birle Hüseyn ol iki şems-i burc-ı dîn

 Kim olardur nûr-ı ‘ayneyn-i ‘Alî-yi Murtazâ

 Cümlesinüñ rûhuna bî-hadd selâm olsun selâm

 Cümlesinden râzî o[ls]un Hazret-i Rabbü’l-’alâ

Şefkat ü rahm eyleyüp ihsân u lutf izhâr idüp

İy şefî’ olan güneh-kâr ümmete rûz-ı cezâ

30 Mücrim ü ‘âsî olan Nazmî güneh-kârı dahı

 Lutf u ihsân eyleyüb kılma şefâ’atden cüdâ

 Budur aksâ-yı murâdı Hak ta’âlâdan anuñ

 Dînüñ-ile hatm ola vü ümmetüñle haşr ola

Yrd. Doç. Dr. Sibel ÜST, EDİRNELİ NAZMÎ DÎVÂNI (İNCELEME-METİN) T. C. KÜLTÜR VE TURİZM BAKANLIĞI, 2012 www.kulturturizm.gov.tr

 Edirneli Nazmi Hayatı

Pend-i Attâr Tercümesi

Mecma'un-Nezâ'ir'i

Divanı ve Türki Basit