Sa‘âdetlü Pâdişâh-ı ‘Âlem-penâh Hazretleri

Sa‘âdetlü Pâdişâh-ı ‘Âlem-penâh Hazretleri Sefere Gitdükde Virilmişdür

- . - - / - . - - / - . - - / - . –

1.‘Azm-i rezm idüp şeh-i kişver-güşâ-yı kâm-yâb

 Sarsar-ı kahrıyla saldı cân-ı hasma ıztırâb

2.Geldi ol demler ki enfâs-ı du‘â-yı ehl-i hâl

 Hükmin izhâr eyleyüp ola felekden feth-i bâb

3.Esdi ol bâd-ı sehergâhî ki dest-i lutf ile

 Eyleye ruhsâre-i maksûddan ref‘-i nikâb

4.İrdi ol günler ki sûr-ı pür-sürûr idüp guzât

 Nev-‘arûs-ı fethe hûn-ı hasm ola gül-gûn-hizâb

5.İtdi a‘dâ-yı zagân girdâra kasd-ı intikâm

 Her dil-âver şeh-per-i terkeşle mânend-i ‘ikâb

6.Küre-nây-ı remze âheng oldı kûs-ı heft-cûş

 Kâse-i tanbûra döndi yankılandı nüh-kıbâb

7.Deprenüp gark-ı şecâ‘at merd-i remzüñ sînesi

 Ceng-i harbîden hurûşân oldı mânend-i rebâb

8.Nîzeler sûzen-veş itdi çarh-ı atlasdan güzâr

 Âsterdür şukka gûyâ riştedür târ-ı şihâb

9.Nevk-i rümh itdi kalem-kârı sipihrüñ safhasın

 Hatlarıyla levh-i usturlâba döndi âfitâb

10.Virdi hakkâ kim Süleymân bârgâhından nişân

 Fîl-i çengîlerle bebr-i ser-keş ü Şîrân-ı gâb

11.Kûh-ı kûhân üştür-i ser-mest kim tutdı yükin

 Virdi germiyyet-i zer surh aña çün sahbâ-yı tâb

12.Çıkdı bir ‘asker ki olmaz kemterîn saffı anuñ

 Gelse âlây ile Cemşîd ü Cem ü Efrâsiyâb

13.Kıldı ol deryâ gibi ‘askerle ‘azm-i haymegâh

 İtdi bürrân içre bahr-ı sebzezârı pür-habâb

14.Döndi şem‘-i şu‘leye altun ‘alemle ol sütûn

 Hayme-i zengâr-ı zerrîn-felek-i sîmîn-tınâb

15.Oldı dest-i nusretle altun göbeklü bir siper

 Hayme-i zengâr-ı zerrîn felek-i sîmîn-tınâb

16.Hargeh-i gerdûn-nişân öñinde gûyâ tuglar

 Oldı kapmaga hamâm cân-ı a‘dâyı sehâb

17.İtdi orduyı ihâta top-ı gerdûn-kûblar

Hak bu kim özge tılısm oldı o genc-i pür-kıbâb

18.Cân bulur kazdıkca gûyâ ejder-i efsurdedür

 Utına degseñ ider her biri bir şehri harâb

19.Hasma karşu dâ’imâ atlamaga durur hemân

 Zabt içün zencîre çekmiş hüsrev-i mâlik-rikâb

20.Saff-ı âhen-pûş-ı ceyşin sedd-i İslâm eyledi

 Bârekallah dâver-i Cem-kadr İskender-cenâb

21.Mâh-ı ‘Âlî-menzilet hâkân-ı Haydar-menkabet

 Şâh-ı kisrâ ma‘delet Dârâ-yı Kârûn-ihtisâb

22.Pâdişâh-ı bahr ü ber kişver-güşâ-yı dâd-ger

 Hüsrev-i ‘âlî-nazar fermân-revâ-yı şeyh ü şâb

23.Kâhir-i Gîv ü Peşen a‘dâ-küş-i düşmen-şiken

 Kahramân-ı tîg-zen sâhib-kırân-ı kâm-yâb

24.Hazret-i Sultân ‘Osmân Hân-gâzî kim virür

 Gerd-i süm-i eşhebi çeşm-i nücûma fer ü tâb

25.Ol şehen-şâh-ı felek hargâh-ı ‘âlî-câh kim

 Tîg-i âteş-tâbı eyler zümre -i bed-hâhı âb

26.Ol şehen-şâh kim salup tabura top-ı haşmeti

 Kabr-i kâfir-veş ider handekleri cây-ı ‘azâb

27.Ol şehen-şeh kim ider deryâda hûn-ı hasm ile

 Zevrakın câm-ı şarâb u güllesin yir yir hibâb

28.Ol şehen-şeh kim kılur sahrâda nûr-ı kahr ile

 Hayme-i hasmı fişek çadırları gibi harâb

29.Berk-i âteş-tef-i kahrı hırmen-i a‘dâya nâr

 Bahr-i gevher kef-i tîgi ravza-ı İslâma âb

30.Köhne çârûb-ı deri şeh-per-i fark-ı Keykubâd

 Kemterîn ferrâşesi tâc-ı ser-i Efrâsiyâb

31.Virdi sıyt-ı top-ı gerdûn-kûbı çarha zelzele

 Saldı reşk-i tab‘-ı gevher-rîzi bahre ıztırâb

32.Pençe-i kahrıyla hokkâ oldı nevk-i hâmesi

 Fitne-bend ü dehr-i dûn müşkil-güşâ-yı şeyh ü şâb

33.Bend-i kahrı ger mesîl-i fitneyi sedd itmese

 Yürimez kalurdı devrinden bu köhne âsiyâb

34.Bezm-âsâ pençe-gûr olurdı gâh idmân içün

 Lîk yokdur pençe-i hûrşîdde ol deñlü tâb

35.‘Âleme bast itdi yolıyla bisât-ı re’feti

 Çarh-ı kej-rev nola ser-keşlikden itse ihtisâb

36.Kimseden hîç kimse bir kişverde incinmiş degül

 Kat‘-ı Nîl-i Mısr’da ola meger kim şekker -âb

37.İrse sahn-ı bâga bûy-ı lutfınuñ bir nefhası

 Penbe-i verd-i sefîdi eyleye pür-müşg-i nâb

38.Berg-i gülbün mastar-ı pür-rişte olsa yaraşur

 Yazsalar gül safhasına midhatinden bir kitâb

39.Matbah-ı in‘âmınuñ bir sürfe sahnı sanurın

 Birbiri üzre göründükce sipihr-i nüh-kıbâb

40.Vakt-i rezm olsa olur her bir bendesi bir şîr-i ner

 Hasm-ı mekkâr olur ol dem bere-i âhû-şitâb

41.Bahs idem dirse başın yir düşmen-i hayvân-sıfat

 Kulları hasma sunar mânende-i şîrân-ı gâb

…….

………….

Saadet KARAKÖSE, NEV’Î-ZÂDE ATÂYÎ DÎVÂNI, Malatya 1994

Nevizade Atai Nev'îzade AtâyiHayatı Eserleri

Nev'izade Atayi'nin Hamsesi Ve Hezliyat

Nev'izade Atayî Divanı Hadaikül Hakayık Şakayık Zeyli

Nevizade Atai Alemnüma ve Sakiname Mesnevisi