Sanma ey hâce ki senden zer ü sîm isterler
GAZEL : Sanma ey hâce ki senden zer ü sîm isterler
Sanma ey hâce ki senden zer ü sîm isterler
“Yevme lâ-yenfa‘u”da kalb-i selîm isterler
Berzâh-ı havf ü recâdan geçegör nâkâm ol
Dem-i âhırda ne ümmîd ü ne bîm isterler
Unudup bildigini ‘ârif isen nâdân ol
Bezm-i vahdetde ne ‘ilm ü ne ‘alîm isterler
‘Âlem-i bî-meh ü hurşîd ü felekde hergiz
Ne mühendis ne müneccim ne hakîm isterler
‘Âlem-i keşf-i ma‘ânîde çok esrâr açılur
Varamaz nefs-i gazûb anda halîm isterler
Harem-i ma‘nâya bîgâneye yol virmezler
Âşinâ-yı ezelî yâr-i kadîm isterler
Sâkin-i dergeh-i teslîm-i rızâ ol dâ'im
Ber-murâd itmege hidmetde mukîm isterler
Dergeh-i fakre varup dirlügini arz itme
Anda hergiz ne sipâhî ne za‘îm isterler
Cürmüne mu‘terif ol tâ‘ata mağrûr olma
Ki şifâ-hâne-i hikmetde sakîm isterler
‘Âşık ol şerbet-i vasl ister isen kim ‘uşşâk
Çâresiz derd arayup renc-i elîm isterler
Ni‘met-i zâhire dilbeste olan gürsineler
Müzd-i nâm-pâreye cennât-ı na‘îm isterler
Kıble-i ma‘nâya fehmeylemeyen keçrevler
Sehv ile secde idüp ecr-i ‘azîm isterler
Ezber it kıssa-i esrâr-ı dili ey Rûhî
Hâzır ol bezm-i ilâhîde nedîm isterler
Öztoprak, Nihat (2001). Rûhî. İstanbul: Timaş Yayınları.
