Seyr-i ruhunla çeşm-i adû rûşenâ değil

GAZEL

Seyr-i ruhunla çeşm-i adû rûşenâ değil 
Huffâş-i tîre-dîde ziyâ-âşnâ değil 

Şâyeste görmedin beni pâmâlin olmağa 
Ey şeh-süvâr-i mülk-i melâhat revâ değil 

Âhımdan itdi mevce-i çîn-i cebin zuhûr 
Bâdî telâtum-i yem-i hüsne sabâ değil 

Teng(î-i) ayşımız n'ola her bir nefes beğim 
Dilden hayâl-i fikr-i dehânın cüdâ değil 

Zâhid aceb mi görmez ise câm-i bâdeyi 
Nâ-mahremâna duhter-i rez rû-nümâ değil 

Agyâra urma itme telef zahm-i tîgini 
Ol hâk-i şûre kâbil-i neşv ü nemâ değil 

Lâ'l ü nebâta lâ'lini teşbih Râgıbâ 
Hâyîde bir suhandir o şîrîn-edâ değil 

 

 Koca Ragıp Paşa Şiirleri

 Hayatı ve Edebi Kişiliği

 Divanı ve Diğer Eserleri