GAZEL : Yârdan geldi bize virdi haberler kâğıd
Yârdan geldi bize virdi haberler kâğıd
Başlar üzre yir iderse yiridür her kâğıd
Şerh-i vasfı o mehün irmeye pâyâna henüz
Fi’l-mesel ger ola eflâk ser-â-ser kâğıd
Âsumânda görinen mihr-i cihân-tâb değül
Uçurur her seher ol serv-i semenber kâğıd
Her kaçan alsam ele yazmaga sûz-ı dilümi
Od düşer üstine fi’l-hâl yanar her kâğıd
Ol mehün kılmagıçün ârızı vasfın tahrîr
Bâğda almış eline her gül-i ahmer kâğıd
Arz-ı hâl itmege ol şâhsüvâre olmaz
Safha-i çihre-i zerdüm gibi bir zer kâğıd
Yazmağa vasf-ı ruh-ı yâr ile Rûhî şi’rin
Çarhda almış ele mâh-ı münevver kâğıd
Öztoprak, Nihat (2001). Rûhî. İstanbul: Timaş Yayınları.