Ol melek-sîmâ perî kim benzemez insân aña

Gazel

Ol melek-sîmâ perî kim benzemez insân aña

Cân ile dilden fedâ olsun hezârân cân aña

Ey felek dervâzesin açma dem-i subhun sakın

Bir gece ger sarılam ben hasta-dil uryân aña

Gerdenine hâleyi tavk eyledi uşşâk-vâr

Boynu baglı bir kul olmuştur meh-i tâbân aña

Gülşen-i derdin nihâlidir bu cism-i nâ-tüvân

Meyvedir bagrım başı berg oldu her peykân aña

Gördü ekdim mezra’ı dilde mahabbet dânesin

Dûd u âhım ebr olup yagdırdı çok bârân aña

Dâg-ı gamdan rûyu hûn-âlûdedir cismim gibi

Âşık olmuştur meger kim lâle-i Nu'mân aña

Yâr hecriyle Hayâlî şöyle mûnis oldu kim

Rûz-ı vuslat gibi olmuştur şeb-i hicrân aña

(Hayâlî Bey Divanı sf. 99)

Savaşkan Cem BAHADIR, “HAYÂLÎ BEY’İN BİLİNMEYEN GAZELLERİ”, Turkish Studies - International Periodical For The Languages, Literature and History of Turkish or Turkic Volume 7/4, Fall 2012, p. 921-946, ANKARA-TURKEY

 Hayali Bey Hayatı

Hayali Bey Divanı

Hayali Bey Şiirleri