Tutuşdı gam odına şâd gördügün gönlüm
06.04.2016
( Hayali'nin Şirine Nazire )
Tutuşdı gam odına şâd gördügün gönlüm
Mukayyed oldı ol âzâd gördügün gönlüm
Diyâr-ı hicrde seyl-i sitemden oldı harâb
Fezâ-yı ışkda âbâd gördügün gönlüm
Ne gördi bâdede bilmen ki oldı bâde-perest
Mürîd-i meşreb-i zühhâd gördügün gönlüm
Firâkun odını gördükçe mûm tek eridi
Sebât u sabra fûlâd gördügün gönlüm
Getürdi acz görüp ışk müşkil oldugını
Kamu hünerlere üstâd gördügün gönlüm
Degüldi beyle deminde bir ehl-i işret idi
Bu kanlar içmege mu‘tâd gördügün gönlüm
Fuzûlî eyledi âheng-i ıyş-hâne-i Rûm
Esîr-i mihnet-i Bagdâd gördügün gönlüm
(Fuzûlî 1286: 192; Gölpınarlı 1985: 110)
