Gazel
Zevk-i bâde neydigin mest-i harâbîler bilür
Lâcerem deryâ zebânın murg-ı âbîler bilür
Vuslatın cennâtının râhatleri âlemlerin
Dûzah-ı hırmanda nâr olmuş azâbîler bilür
Sâye-perverler gözü bir perteve kılmaz nazar
Neydigin nûr u tecellî âfitâbîler bilür
Yoluna hâk olmanın âdâbını uşşâka sor
Saltanat âyînini Efrâsiyâbîler bilür
Hâk-i râhınken Hayâlî havf eder agyârdan
Hâricîler kibr ü kînin Bû-Türâbîler bilür
(Hayâlî Bey Divanı sf. 171)
Savaşkan Cem BAHADIR, “HAYÂLÎ BEY’İN BİLİNMEYEN GAZELLERİ”, Turkish Studies - International Periodical For The Languages, Literature and History of Turkish or Turkic Volume 7/4, Fall 2012, p. 921-946, ANKARA-TURKEY